Қорақалпоғистонда шамол электр станцияси қуришга 9 та компания таклиф киритди

Энергетика вазирлиги Қорақалпоғистоннинг Беруний туманида шамол электр станцияси қурилиши бўйича тендернинг иккинчи босқичи бошланганини эълон қилди.

Лойиҳа доирасида Қорақалпоғистон Республикасида 200 мегаватт қувватга эга шамолдан электр энергиясини ишлаб чиқариш ҳамда энергия сақлаш тизими (аккумулятор) амалга оширилади. Тендерда ғолиб бўлган иштирокчи шамол ва аккумуляторларни молиялаштириш, лойиҳалаштириш, қурдириш, ишлатиш, техник хизмат кўрсатиш ва шартнома муддати охирида станцияни қолдириб кетиш ёки бузиб, ерни асл ҳолига қайтариши лозим бўлади.

Станция Қорақалпоғистон Республикасининг Беруний туманида қад ростлайди.

Тендернинг бу босқичида биринчи босқичдаги саралашдан ўтган компаниялар ўзларининг техник, тижорий ва тариф таклифларини тақдим этишади:

1. Abu Dhabi Future Energy Company PJSC – Masdar (БАА);
2. АCWА Power Company (Саудия Арабистони);
3. Concord New Energy Group Limited (Гонконг);
4. China Datang Overseas Investment Co. Ltd. (Хитой) ва Goldwind International Holdings (HK) Limited (Гонконг) компаниялари консорциуми;
5. EDF Renouvelables S.A. (Франция);
6. Eksim Enerji Anonim Şirketi (JSC Eksim Enerji) (Туркия);
7. ReNew Vyan Shakti Private Limited (Ҳиндистон);
8. Universal Energy Co. Ltd. (Хитой);
9. Voltalia SA (Франция).

Танлов иштирокчилари ўз таклифларини 2023 йил 29 июль Тошкент вақти билан соат 18:00 гача тақдим этишлари сўралган. Лекин танлов давомида иштирокчиларнинг мурожаатларига кўра, муддат ҳаммага узайтириб берилиши мумкин.

Март бошларида Саудия Арабистонининг АCWА Power компанияси Ўзбекистон Инвестициялар, саноат ва савдо вазирлиги ва “Ўзбекистон миллий электр тармоқлари” акциядорлик жамияти ўртасида инвестиция ва электр энергиясини сотиб олиш тўғрисида учта битим имзоланганди. Битимлар Тошкент ва Самарқанд вилоятларида умумий қуввати 1 400 МВт бўлган иккита қуёш фотоэлектр станцияси ҳамда Тошкент, Бухоро ва Самарқанд вилоятларида умумий қуввати 1 200 МВт бўлган учта энергия сақлаш тизимлари жорий этилишини ўз ичига олади.

Шунингдек, Ўзбекистон энергетика сектори Форс кўрфазидан миллиардлаб доллар жалб қилмоқда, чунки мамлакат 2030 йилга бориб электр энергиясининг 35 фоизини қайта тикланадиган манбалардан ишлаб чиқаришни режалаштирган.