Наманган шаҳар Давлатобод туманида 152 маротаба қоидабузарлик содир этган ҳайдовчи аниқланди. Бу ҳақда Наманган вилояти ИИБ ахборот хизмати хабар берди.
Қайд этилишича, 31 март куни соат 23:30 атрофида туманнинг Ислом Каримов кўчасида Hyundai Sonata русумли 01 Т 234 ZА давлат рақам белгили автомашина ЙПХ ходими томонидан тўхтатилиб, ҳайдовчидан ҳайдовчилик гувоҳномаси ва автомашинага тегишли бўлган ҳужжатларни кўрсатилиши талаб қилинган.
Руль бошқарувидаги ҳайдовчи автомашина унга тегишли эмаслигини айтиб, ходимга ҳеч қандай ҳужжат бермаган. Шундан сўнг автомашина белгиланган тартибда вақтинча сақлаш учун жарима майдонига қўйилган.
Мазкур ҳолат юзасидан терговга қадар текширув олиб борилганда автомашинани рўйхатдан ўтказиш гувоҳномаси йўқлиги, юқоридаги давлат рақам белгиси эса ЙҲХХдан рўйхатдан ўтказилмагани аниқланган.
Чуст туманида яшовчи 33 ёшли фуқарога тегишли бўлган автомашинада содир этилган маъмурий ҳуқуқбузарликлар ўрганилганида, ҳайдовчи 2023 йилнинг шу вақтига қадар жами 152 та ҳолатда тезликни меъёридан оширгани ва ушбу қоидабузарликлари ортидан юзага келган жарима суммаси 410 миллион сўм экани маълум бўлган.
Бироқ давлат рақам белгиси ҳақидаги маълумотлар тизимда мавжуд эмаслиги боис содир этилган қоидабузарликларга нисбатан жарима солиш тўғрисидаги қарор чиқаришнинг имкони бўлмаган.
“Ушбу ҳайдовчи ҳеч қаерда қайд этилмаган давлат рақам белгиси билан автомашинани истаган тезликда бошқариб инсонлар ҳаётига хавф солиб келган. Ҳозирда юқоридаги ҳолат юзасидан терговга қадар текширув ҳаракатлари олиб борилмоқда. Автомашина жарима майдонида”, — дейилади хабарда.
Эслатиб ўтамиз, 2021 йилда Тошкентда битта автомашинага уч хил рақамни алмаштириб тақиб, 2 йил давомида 60 дан ортиқ қоидабузарлик содир этган ҳайдовчи ушланганди. 2022 йилда эса Тошкентда 63 та қоидабузарлик содир этган ҳайдовчи 50 миллион сўм жарима тўлаган.
Изоҳ (0)