DXX hamda Bosh prokuratura huzuridagi departamentning Andijon viloyati boshqarmasi xodimlari tomonidan o‘tkazilgan tezkor tadbirda Izboskan tumani hokimi o‘rinbosari 500 dollar pora olayotganida qo‘lga tushdi. Bu haqda “Daryo” muxbiri xabar bermoqda.
“Daryo” manbasining maʼlum qilishicha, mazkur holat yuzasidan viloyat hokimi Shuhrat Abdurahmonov shanba, 8-aprel kuni o‘tkazilgan yig‘ilishda maʼlum qilgan.
Taʼkidlanishicha, Izboskan tumani hokimining investitsiya, sanoat va savdo yo‘nalishi bo‘yicha o‘rinbosari A.K. Katta Farg‘ona kanali himoya hududidan 0,08 ga yer maydonini “E-auksion”dagi savdolarni yopiq shaklda o‘tkazgan holda sotib olib berishda yordam berishini aytib, evaziga pul talab qilgan. U 7-aprel kuni talab qilingan pullardan 500 dollarini xizmat xonasida olayotganida qo‘lga tushgan.
Mazkur holat yuzasidan Jinoyat kodeksining tegishli moddalari bilan jinoyat ishi qo‘zg‘atilgan. Hozirda tergov harakatlari davom etmoqda.
A.K. 2022-yilning oktabr oyidan buyon tuman hokimi o‘rinbosari — tuman investitsiyalar va tashqi savdo bo‘limi boshlig‘i lavozimida faoliyat yuritib kelgan.
Izoh (1)
Ассалому алайкум, маҳаллий ҳокимлик ходимларини ойлигини купайтирса манимча порахурлик узи камаяди, порохурликни сабаби хам шунда мани фикрим, оддий орган ходимлари отни калласидай ойлик олишади факат узининг йуналишига жавоб беради, махаллий хокимликлар эса аксинча энг паст ойлик олишади.
мана порохурликни келтириб чикишига асосий сабаб