Канада расмийлари Бирлашган Миллатлар Ташкилоти Хавфсизлик Кенгашининг Шимолий Кореяга қарши санкциялари бажарилишини назорат қилиш учун Японияга CP-140 Aurora разведкачи самолётини юборди. Бу ҳақда Канада мудофаа вазирлигининг пресс-релизида айтилади.
“Ҳинд-Тинч океани минтақасидаги ҳаракатлар стратегиясининг бир қисми сифатида (разведкачи самолётнинг) жойлаштирилиши Канаданинг минтақада тинчлик ва барқарорликни таъминлашга қатъий содиқлигини кўрсатади”, — деди вазирлик.
Олти ҳафта давомида CП-140 Aurora Шимолий Кореянинг БМТ денгиз санкцияларидан бўйин товлаши, шу жумладан ёнилғи ва бошқа товарларни кемадан кемага ўтказиши бўйича эҳтимолий ҳолатларни кузатади.
Канаданинг Ҳинд-Тинч океани минтақасида ҳарбий иштирокини кучайтириш учун бортида CH-148 Cyclone вертолёти бўлган HMCS Montréal фрегати жўнатилади. У ҳам КХДРга қарши санкциялар ижросини назорат қилади.
Канада миллий мудофаа вазири Анита Ананд ўтган йилнинг ноябрь ойида Ҳинд-Тинч океани минтақасида мамлакатнинг ҳарбий иштирокини ошириш режаларини эълон қилганди. Унинг сўзларига кўра, шу тариқа Канада ўз ҳамкорлари ва иттифоқчилари билан хавфсизлик соҳасида муносабатларни мустаҳкамлайди.
Канада ҳарбийлари БМТ Хавфсизлик Кенгашининг Шимолий Кореяга қарши санкцияларини қўллаб-қувватлаш учун мўлжалланган NEON операциясида иштирок этмоқда. Ташкилот уларни 2006—2017 йиллар оралиғида КХДРни оммавий қирғин қуроллари бўйича дастурлардан воз кечишга мажбурлаш мақсадида жорий қилганди.
Изоҳ (0)