O‘zbek kino olamidagi bir-biriga o‘xshamas rollari bilan mashhur bo‘lgan aktrisa Asal Shodiyeva 6-aprel kuni 31 yoshni qarshi oldi. Shu munosabat bilan quyida aktrisa ishtirokidagi eng esda qolarli filmlar haqida ma’lumot beriladi.
Aktrisa, xonanda Asal Shodiyeva 1992-yilning 6-aprel sanasida Toshkent shahrida tavallud topgan. Asal san’atga kirib kelgan ilk yillarida “O‘zbekistonim” nomli taronani ijro etgan. U Uspenskiy nomidagi musiqaga ixtisoslashtirilgan maktabda tahsil olgan.
Keyinchalik Asal Shodiyeva aktrisalik sohasida o‘zini sinab ko‘rdi va aynan shu yo‘nalishda mashhurlikka erishdi. U kino olamidagi faoliyati davomida 30 ga yaqin filmda suratga tushgan.
“Janob hech kim”, “Uchar qiz”, “Uylanish”, “Hay-hay qizaloq”, “Majnun”, “Poyga”, “Vahshiy”, “Qaysar oshiqlar” aktrisa ijodidagi muvaffaqqiyatli filmlar hisoblanadi. Aktrisa kinodagi faoliyatida tanaffus e’lon qilganidan keyin “Soxta”, “Uchta so‘z” kabi taronalarini muxlislariga taqdim etdi.
Asal Shodiyeva 2016-yilning 5-iyun sanasida xonanda Shohruxxon bilan turmush qurdi. Juftlikning to‘yida o‘zbek shou-biznesining ko‘plab taniqli vakillari, jumladan O‘zbekiston xalq artisti Nasiba Abdullayeva, Ulug‘bek Rahmatullayev, Asilbek Nig‘matov, Botir Qodirov, Jahongir Poziljonov, O‘zbekiston xalq artisti Yulduz Usmonova, Shahzoda va o‘zbek shou-biznesining boshqa vakillari ishtirok etgan.
Asal Shodiyeva turmush qurganidan keyin kinofilmlarda suratga tushishni kamaytirdi va vaqtini oilaga sarfladi. Ijodga qaytganidan keyin aktrisa turmush o‘rtog‘ining “Yurak”, “Gulim” taronalariga ishlangan videokliplarda suratga tushdi. Hozirda farzand tarbiyasi bilan mashg‘ul bo‘lgan Asal Shodiyeva xonandalikdagi ijodini ham davom ettirmoqda.
2020-yilning 3-sentabr sanasida Shohruhxon va Asal Shodiyeva ilk marta ota-ona bo‘ldi. Ular birinchi farzandiga Muhammadyusuf deb ism qo‘ygan. Oradan ikki yil o‘tib aktrisa yana bir bor ona bo‘lishini ma’lum qildi va ikkinchi farzandi Baxtiyorni Turkiyada dunyoga keltirdi.
Quyida aktrisa ishtirokidagi eng yaxshi filmlar haqida ma’lumot beriladi.
“Uylanish” filmi
Rejissor Jahongir Ahmedov tomonidan 2009-yilda suratga olingan filmda Asal Shodiyeva hamkasbi Alisher Uzoqov bilan partnyor bo‘lgan. Ushbu filmda Asal Shodiyeva yaxshi ko‘rgan insonini sevgisi uchun kurashishga undaydi va sinovdan o‘tkazadi. Otasining haydovchisini yoqtirib qolgan qiz turli xil sinovlar bilan bo‘lajak turmush o‘rtog‘ini qay darajada uni yaxshi ko‘rishini, murakkab vaziyatlardan qanday chiqib keta olishini bilib oladi. Kinokartinada Shohida Uzoqova, Matyoqub Matchonov, Xosiyat Husanova, xonanda Farruh Komilov va boshqa aktyorlar rol ijro etgan. Tomoshabinlar ushbu filmni haligacha sevib tomosha qiladi.
“Uchar qiz”
Aktrisa ishtirokidagi keying muvaffaqqiyatli film — “Uchar qiz” kinokartinasi hisoblanadi. Asal Shodiyeva bu filmda Adiz Rajabov bilan partnyorlikda rol ijro etgan. O‘zga sayyoralik qiz oddiy qishloqqa kelib, bir oilaning hayotini o‘zgartirib yuboradi. Har qanday dardni davolay olishi bilan tanilgan “shaharlik qiz” qishloqdagi ko‘plab insonlar hurmatini qozonadi. Biroq birgina insonning tuhmati bilan barchasi o‘zgarib ketadi. Filmning oxirida o‘zga sayyoralik qiz o‘z makoniga uchib ketib, yana qaytib keladi va Adiz Rajabov uni yoqtirib qoladi. Ushbu filmda Saida Rametova, Jumadulla Rametov va boshqa aktyorlar ishtirok etgan. Film rejissor Yolqin To‘ychiyev tomonidan 2014-yilda suratga olingan.
“Sevgi farishtasi”
“Sevgi farishtasi” filmi ham Asal Shodiyevaning ijodida alohida o‘rin tutgan loyihalardan biri. Kinokartinada Dilniyoz G‘afforov yaxshi ko‘rgan insonining qalbini zabt etish uchun harakat qiladi. Bu borada unga do‘sti yordam beradi. Kutilmaganda uning do‘sti avtohalokat sabab vafot etadi, biroq shundan keyin ham u ruh qiyofasida yaqin do‘stiga yordam berishda davom etadi. Dilniyoz G‘afforov yaxshi ko‘rgan insoniga, ya’ni Asal Shodiyevaga uning qalbini zabt etishida yaqin do‘sti ruh qiyofasida yordam berganini aytadi. Qiz bunga ishonmaydi va yigitdan xafa bo‘ladi, biroq kinokartinaning yakunida u Dilniyozning aldamaganini tushunib yetadi. Filmda Alisher Uzoqov, Asal Shodiyeva, Dilniyoz G‘afforov, Adiz Rajabov va boshqa aktyorlar ishtirok etgan.
“Hay-hay qizaloq”
“Hay-hay” qizaloq filmidagi rol Asal Shodiyevaning boshqa obrazlaridan tubdan farq qiladi. Aktrisa bu filmda erka, hayotda hech kimning gapi bilan ish tutmaydigan, o‘zidagi hech narsani yaxshi tomonga o‘zgartirishni istamaydigan obrazni gavdalantirgan. Birgina qilingan xato ish tufayli bobosi bilan qishloqqa jo‘nab ketgan qiz soxta sevgi tufayli hayotidagi ko‘p narsani yaxshi tomonga o‘zgartiradi va bir qancha sinovlarni boshdan kechiradi. Film yakunida u soxta sevgisini yo‘qotib, haqiqiysini, yomon insonlardan voz kechib yaxshilarini topadi. Bu film hayotdagi har bir qilingan tanlovni yana bir qayta o‘ylab ko‘rishga chorlaydi. Kinokartinada xonanda Munisa Rizayeva, Ubaydullo Omon, Umid Iskandarov va boshqa aktyorlar rol ijro etgan. Aktrisaning bu loyihadagi ijrosi salbiy bo‘lsa-da, tomoshabinlar uning ishtirokidagi bu filmni ham yaxshi kutib olgan.
“Janob hech kim”
2009-yilda suratga olingan “Janob hech kim” filmida aktrisa Asal Shodiyeva yana Alisher Uzoqov bilan partnyor bo‘ldi. Tomoshabinlar e’tirofiga sazovor bo‘lgan filmda u kutilmaganda hayotiga kirib qolgan inson aslida uni aldaganini biladi. Barchasi kech bo‘lishiga bir bahya qolganda, yana voqealar boshqa tomonga o‘zgarib ketadi. U tanlagan inson hayotning ko‘plab qiyinchiliklarini boshdan kechirgan, onasiz voyaga yetgan inson bo‘ladi. Kinokartina yakunida juftlik baxtli hayot sari qadam tashlaydi. Loyihada Iroda Nosirova, Alisher Uzoqov, Madina Mumtoz, Gulchehra Eshonqulova va boshqa mashhur aktyorlar ishtirok etgan.
“Poyga”
Asal Shodiyeva “Poyga” filmida oddiy oilada voyaga yetgan, oliygohda tahsil olayotgan qiz rolini ijro etgan. Aktrisaning bu loyihadagi partnyori — Yigitali Mamajonov. Filmda qiz otasi qidirayotgan qoidabuzarni yoqtirib qoladi, biroq yigit aslida kim ekanligini hammadan sir tutadi, bunga esa ota-onasining o‘limiga sababchi bo‘lgan jinoyatchining qilgan ishi, qasos olish niyati asos bo‘ladi. Filmda Matyoqub Matchonov, marhum aktyor Abdurayim Abduvahobov, Yigitali Mamajonov va boshqa aktyorlar ishtirok etgan.
“Majnun”
“Majnun” filmidagi jurnalist qiz roli ham aktrisaning qay darajada mahoratli ekanini muxlislarga ko‘rsatib berdi. U filmda ko‘p yillar oldin hech bir ma’lumotsiz yo‘qolgan mashhur futbolchini izlab topadi va u haqda loyiha qilishga qaror qiladi. Keyinchalik qiz rafiqasining vafoti tufayli majnunsifat ahvolga kelgan yigitni yaxshi ko‘rib qoladi va ko‘plab sinovlarni boshdan kechiradi. Hayotiga hech kimni kiritishni istamagan yigit qizni ranjitadi. Taqdirga tan berib, o‘z uyiga qaytib ketgan qizning hayoti kutilmaganda boshqa tomonga o‘zgarib ketadi. Bu kinokartinada Ulug‘bek Qodirov, Muhammadiso Abdulxairov, Ra’no Shodiyeva, Matyoqub Matchonov ham o‘z obrazlarini mahorat bilan gavdalantirgan.
Izoh (0)