“Янги Ўзбекистон” массивлари бўйича масъул раҳбарларга ҳайфсан эълон қилинди

“Янги Ўзбекистон” массивлари бўйича уйни фойдаланишга топшириш чўзилиб кетаётгани сабабли бир қатор раҳбарларга ҳайфсан эълон қилинди. Бу ҳақда президент матбуот котиби хабар берди. 

Хабарга кўра, 2022 йилда 31 та “Янги Ўзбекистон” массивларини қуриш дастури бошланган эди. Йиғилишда бу борадаги ишлар Андижон ва Хоразмда яхши кетаётгани таъкидланиб, Бухоро, Қашқадарё, Навоий, Самарқанд, Сурхондарё ва Сирдарёдаги массивларда ҳокимларнинг эътиборсизлиги оқибатида бирорта уй фойдаланишга топширилмагани қаттиқ танқид қилинди.

“Янги Ўзбекистон” массивлари бўйича Фарғонада 80 та, Самарқандда 36 та, Тошкент вилоятида 15 та, Наманганда 14 та уйни фойдаланишга топшириш чўзилиб кетаётгани кўрсатиб ўтилди. 

Қайд этилишича, шу муносабат билан Бухоро, Қашқадарё, Навоий, Наманган, Самарқанд, Сурхондарё, Сирдарё, Фарғона ва Тошкент вилояти ҳокимларининг қурилиш бўйича ўринбосарлари, Марказий банкнинг вилоят бўлинмалари раҳбарларига ҳайфсан эълон қилинди ва вазиятни ўзгартириш учун бир ой муҳлат берилди. 

Шунингдек, 2023 йилда янги уй-жой қуриш ҳажмини 1,5 бараварга ошириб, 90 мингтага етказиш вазифаси қўйилди.