Ўзбекистон Бош прокуратурасига россиялик ҳарбий комиссар Владлен Татарскийни ўлдиришда айбланаётган Даря Трепованинг турмуш ўртоғи Дмитрий Риловни ҳибсга олиш бўйича Россиядан сўровнома келиб тушмади. Бу ҳақда Бош прокуратура хабар берди.
Маълум қилинишича, Дмитрий Рилов Ўзбекистон Республикаси давлат чегарасини кесиб ўтмаган ва шунга кўра мамлакатда бўлиши мумкин эмас. Аввалроқ Татарскийнинг ўлдирилишида айбланаётган аёл Ўзбекистонга чиқиб кетишни режалаштириб, чипта сотиб олгани хабар қилинганди.
Маълумот ўрнида, 2 апрель куни Санкт-Петербург шаҳридаги кафелардан бирида портлаш содир бўлди, оқибатда урушни тарғиб қилувчи пропогандачи блогер Владлен Татарский ҳалок бўлди. Россия Миллий аксилтеррор қўмитаси қотилликни Украина махсус хизматлари режалаштирганини даъво қилмоқда.
Ҳодиса Университетская соҳилидаги кафеда рўй берган, у ерда Татарскийнинг ижодий кечаси ўтказилаётган эди. Кафега ташриф буюрган Даря Трепова исмли аёл Татарскийга совға қилган ҳайкалча ичида портловчи модда бўлган. Портлаш оқибатида 32 киши жароҳатланган, 25 киши касалхонага ётқизилган. Владлен Татарскийнинг ўзи ҳалок бўлган.
Даря Трепова 3 апрель куни Санкт-Петербургдаги ижарага олинган квартирасида қўлга олинган. Қиз ундан фойдаланишганини айтган. Татарскийнинг ўлдирилишида гумонланаётган аёл Ўзбекистонга чиқиб кетишни режалаштириб, чипта сотиб олгани аниқланган.
Сўнгги маълумотларга кўра, Татарскийнинг ўлими учун жавобгарликни Россия Давлат думаси собиқ депутати Пономарёв билан алоқадор ”Миллий Республика армияси” ўз зиммасига олди. Айнан улар З-фаоллар гуруҳига ва шахсан Татарскийга қарши акцияни уюштиргани ва амалга оширганини қайд этган. Баёнот муаллифлари Треповани қаҳрамон деб атаган ва уни озод қилиш учун ҳамма нарсани қилишга ваъда берган.
Изоҳ (0)