Андижон вилояти Асака туманида қалбаки сўм валюталарини сотишга уринган беш киши қўлга олинди. Бу ҳақда “Бу кун” информацион дастурида маълум қилинди.
Қайд этилишича, Ички ишлар вазирлиги Шахсий хавфсизлик бош бошқармаси Андижон вилояти бўйича бошқармаси томонидан тегишли ҳуқуқ-тартибот органлари билан ҳамкорликда тезкор тадбир ўтказилган. Тадбирда шубҳа уйғотган шахслар 20 миллион сўм сохта пулни 7 миллион сўмга алмаштираётганида қўлга тушган.
Эскпертиза хулосасига кўра, қалбаки пуллар компьютер техникасида нухса кўчириш орқали тайёрланиб, рангли принтерларда чоп этилган.
Ҳолат юзасидан Жиноят кодексининг 176-моддаси (қалбаки пул, акциз маркаси ёки қимматли қоғозлар ясаш, уларни ўтказиш) 2-қисми билан жиноят иши қўзғатилиб, ушбу шахсларга нисбатан қамоққа олиш тарзидаги эҳтиёт чораси қўлланилган. Ҳозирда дастлабки тергов ҳаракатлари давом этмоқда.
Аввалроқ Андижонда 19 млн сўм қалбаки пул ишлаб чиқарган шахс қўлга олингани, Бўстонлиқда эркак ва аёлнинг олдидан қалбаки сўм купюралари топилгани тўғрисида хабар берилганди.
Изоҳ (0)