Andijonda qalbaki 20 mln so‘mni almashtirishga uringan besh kishi ushlandi
Andijon viloyati Asaka tumanida qalbaki so‘m valyutalarini sotishga uringan besh kishi qo‘lga olindi. Bu haqda “Bu kun” informatsion dasturida ma’lum qilindi.
Qayd etilishicha, Ichki ishlar vazirligi Shaxsiy xavfsizlik bosh boshqarmasi Andijon viloyati bo‘yicha boshqarmasi tomonidan tegishli huquq-tartibot organlari bilan hamkorlikda tezkor tadbir o‘tkazilgan. Tadbirda shubha uyg‘otgan shaxslar 20 million so‘m soxta pulni 7 million so‘mga almashtirayotganida qo‘lga tushgan.
Eskpertiza xulosasiga ko‘ra, qalbaki pullar kompyuter texnikasida nuxsa ko‘chirish orqali tayyorlanib, rangli printerlarda chop etilgan.
Holat yuzasidan Jinoyat kodeksining 176-moddasi (qalbaki pul, aksiz markasi yoki qimmatli qog‘ozlar yasash, ularni o‘tkazish) 2-qismi bilan jinoyat ishi qo‘zg‘atilib, ushbu shaxslarga nisbatan qamoqqa olish tarzidagi ehtiyot chorasi qo‘llanilgan. Hozirda dastlabki tergov harakatlari davom etmoqda.
Avvalroq Andijonda 19 mln so‘m qalbaki pul ishlab chiqargan shaxs qo‘lga olingani, Bo‘stonliqda erkak va ayolning oldidan qalbaki so‘m kupyuralari topilgani to‘g‘risida xabar berilgandi.
