Андижонда 2022 йил давомида коррупция ҳолатларини фош этиш борасида олиб борилган тезкор тадбирлар давомида 245 та жиноят иши қўзғатилган. Бу ҳақда Андижон вилояти прокуратураси томонидан ўтказилган матбуот анжуманида маълум қилинди, дея хабар бермоқда “Дарё” мухбири.
Таъкидланишича, Бош прокуратура ҳузуридаги Иқтисодий жиноятларга қарши курашиш Департаменти вилоят бошқармаси ва унинг ҳудудий бўлимлари томонидан 2022 йил давомида жами 527 та ҳуқуқбузарлик аниқланиб, шулардан 491 таси бўйича жиноят ишлари қўзғатилган бўлса, 36 таси бўйича маъмурий ишлар юритилган.
Департаментнинг вилоят бошқармаси ходими Исақжон Ғозибоевнинг маълум қилишича, коррупция ҳолатларини фош этиш борасида 245 та жиноят иши қўзғатилган бўлиб, шундан 33 таси ер масалалари билан боғлиқ.
“2022 йилдаги коррупция ҳолатларини фош этиш борасида олиб борилган тезкор тадбирлар давомида 245 та жиноят иши қўзғатилган. Уларнинг асосий қисми сўнгги вақтда оғриқли ва аянчли ҳолатлардан бири бўлган ер ажратилиши ва эгалик ҳуқуқини берувчи ҳужжатларни тайёрлаб бериш эвазига пул талаб қилганлик ҳолатлари бўлиб, мазкур йўналиш бўйича 33 та жиноят иши қўзғатилган”, — дейди Исақжон Ғозибоев.
Қайд этилишича, иқтисодий жиноятлар билан боғлиқ қўзғатилган ишлар соҳалар кесимида таҳлил қилинганда асосан ҳокимият, соғлиқни сақлаш, таълим, транспорт ва йўл қурилиш тизимларида юз бераётганлиги аниқланган.
Изоҳ (0)