Февралда Сурхондарё Ўзбекистондаги энг “ишбилармон” вилоят бўлди
Ўзбекистонда Ишбилармонлик фаоллиги индекси (ИФИ) 2023 йил февраль ойида 1027 бирликни ташкил этиб, январь ойига нисбатан 2,7 фоизга ошган. Бу ҳақда “Дарё”га Иқтисодий тадқиқотлар ва ислоҳотлар маркази хабар берди.
Шу билан бирга, ишбилармонлик фаоллиги индекси ўтган йилнинг мос даврига нисбатан ҳам 4 фоизлик ўсиш қайд этилди.
Компонентлар даражасидаги ўзгаришлар
2023 йилнинг февраль ойида Ишбилармонлик фаоллиги индекси ўтган ойга нисбатан 2,7 фоизга ошиб, 1027 бирликни ташкил этиши, қуйидаги компонентлар даражасидаги ўзгаришларга боғлиқ бўлган:
- корхоналарнинг банк ҳисобварақаларидаги опреациялар сони 12,3 фоизга ошган;
- фаолият кўрсатаётган корхоналар бўйича компонент 11,7 фоизга камайган;
- товар-хом ашё биржасида хом ашё сотиб олиш жадаллиги 4,7 фоизга ошган;
- товар белгилари бўйича компонент 30,6 фоизга камайган.
Ҳудудлар кесимида Сурхондарё вилоятида энг юқори ўсиш суръати қайд этилган.
2023 йил февраль ойида Ишбилармонлик фаоллиги индекси 11 та ҳудудда ўтган ойга (январь) нисбатан ўсган.
Сурхондарё (47,1 фоиз), Бухоро (44,9 фоиз), Қашқадарё (26,3 фоиз), Жиззах (25,1 фоиз), Навоий (18,8 фоиз) ва Наманган (15,9 фоиз) вилоятларида сезиларли даражада ўсиш кузатилган.
Шу билан бирга ушбу кўрсаткич 3 та ҳудудда камайган. Хусусан, Қорақалпоғистон (-8,1 фоиз), Тошкент (-1,7 фоиз) ва Сирдарё (-0,9 фоиз) вилоятларида ўтган ойга нисбатан камайиш кузатилган.
