Сурхондарёда машиналардан пул ва буюмларни ўғирлаётган гуруҳ ушланди
Сурхондарё вилояти Термиз шаҳрида 25 март куни Matiz олиб қочган йигитлар ушланди. Бу ҳақда Тергов департаменти ахборот хизмати хабар берди.
Маълум бўлишича, номаълум шахс “Дўстлик” маҳалласи ҳудудида 37 ёшли Х.Ғ.га тегишли Matiz’ни номаълум томонга олиб қочиб кетган.
Олиб борилган тергов-тезкор тадбирлари давомида мазкур автомашина номаълум шахс томонидан Термиз тумани “Жўйжангал” маҳалласида ташлаб кетилгани, жабрланувчига тегишли бўлган 200 минг сўм пул ва видеорегистраторда жойлашган флешкарта йўқлиги аниқланган.
Аниқланишича, мазкур жиноятни 18 ёшли Ж.Б. ўзига олдиндан таниш бўлган маҳалладоши, вояга етмаган 15 ёшли М.И. билан бир гуруҳга бирлашиб, жиноий режа тузиб, содир қилгани аниқланган. Улардан автомашина видеорегистраторидан олинган флешкарта ашёвий далил тариқасида расмийлаштириб олинган.
Мазкур ҳолат юзасидан Термиз шаҳар ички ишлар бўлими ҳузуридаги тергов бўлими томонидан Ж.Б. ва вояга етмаган М.И.га нисбатан Жиноят кодексининг 267-моддаси 2-қисмининг “б”,“г” бандлари (транспорт воситасини олиб қочиш) билан жиноят иши қўзғатилиб, гумон қилинувчилар процессуал тартибда ушланган.
Тергов давомида улар бошқа автомашиналар қулфини ҳам бузиб келгани, машинада бўлган қимматбаҳо нарсалар ва пулларини ўғирлагани, мазкур автомашинани эса ўзлари айланиш учун олиб қочишганини баён қилишган. Ҳозирда ушбу шахсларнинг бошқа жиноятларга алоқадорлиги текширилмоқда.
