Давлатнинг қурилиши биринчи ўринда конституция ва қонунларга асосланган бўлади. Бу ҳақда бугун, 28 март куни Адлия вазирлигида бўлиб ўтган матбуот анжуманида адлия вазири Акбар Тошқулов айтиб ўтди, дея хабар бермоқда “Дарё” мухбири.
Анжуманда Акбар Тошқулов янгиланаётган Конституция лойиҳаси ҳақида фикр билдирар экан, қомуснинг энг катта ўзгаришларидан бири — инсон ҳуқуқларининг мустаҳкамланиши эканлигини айтди.
“Аслида нимага керак конституцияга ўзгартириш деганда, баъзи моддалар бор, яъни тўғридан тўғри қўлланадиган жуда кўп моддалар бор. Келажакда давлатнинг қурилиши биринчи ўринда конституция ва қонунларга асосланган бўлади. Ана шу конституцияни принципиал ўзгартирмасдан туриб давлатни ўзгартириб бўлмайди. Буни ривожланган давлатларда ҳам кўришингиз мумкин. Американинг тарихидаги сиёсат нима учун ўзгарган десангиз, конституциянинг фалон моддасига ўзгартириш киритганидан кейин ҳаёт ўзгарган. Худди шундай, бизда ҳам жуда катта ислоҳотлар амалга ошириляпти ва баъзи ислоҳотларни конституцияга ўзгартириш киритмасдан туриб амалга ошириб бўлмайди”, — деди адлия вазир.
Маълумот учун, Олий Мажлис Сенати 14 март куни бўлиб ўтган мажлисда янги таҳрирдаги Конституция тўғрисидаги қонун лойиҳаси бўйича референдум ўтказиш тўғрисидаги қарорни маъқуллаганди. Қонун лойиҳаси “Халқ сўзи” ва “Народное слово” газеталарининг 15 март кунги сонида эълон қилинди. Қонун лойиҳаси 6 бўлим, 155 моддадан иборат. Конституциявий қонун референдум натижалари Марказий сайлов комиссияси томонидан расмий эълон қилинган кундан эътиборан кучга киради. Янги конституция бўйича референдум 30 апрелда ўтказилади.
Эслатиб ўтамиз, 2021 йилда бўлиб ўтган Ўзбекистон президенти сайловига тайёргарлик кўриш ва уни ўтказиш билан боғлиқ харажатларни молиялаштириш учун 300 миллиард сўм ажратилган эди.
Изоҳ (0)