Тошкентда олти ёшли қизга тегажоғлик қилган эркакка нисбатан суд ҳукми ўқилиб, у 10 йилга озодликдан маҳрум этилгани ҳақида хабар берилган эди. Олий суд матбуот котибининг “Дарё”га хабар беришича, унга нисбатан жазо кучайтирилди.
Воқеа 2022 йилнинг ёзида юз берган эди. Октябрь ойида Жиноят ишлари бўйича Юнусобод туман судига Жиноят кодексининг 119-моддаси (жинсий эҳтиёжни зўрлик ишлатиб ғайритабиий усулда қондириш) 4-қисми ва 129-моддаси (16 ёшга тўлмаган шахсга нисбатан уятсиз-бузуқ ҳаракатлар қилиш) 1-қисми билан Р.Ш.га нисбатан бўлган жиноят иши келиб тушган.
Суд муҳокамаси 17 октябрдаги тайинлаш ажрими билан 26 октябрь кунига ёпиқ суд мажлисида кўриш учун тайинланиб, ёпиқ суд мажлисида ишни кўриш бошланган. Суд ҳукми 22 декабрь куни эълон қилинган.
Жиноят ишлари бўйича Тошкент шаҳар Юнусобод туман суди 47 ёшли Р.Ш.ни Жиноят кодексининг 25, (жиноятга тайёргарлик кўриш ва жиноят содир этишга суиқасд қилиш) 119-моддалари билан жиноят содир этганликда айбдор деб топган ва 10 йил муддатга озодликдан маҳрум қилиш жазосига ҳукм қилган.
Маълум бўлишича, 2023 йил 16 февраль куни Тошкент шаҳар суди Жиноят ишлари бўйича судлов ҳайъатининг апелляция инстанцияси Тошкент шаҳри Юнусобод тумани прокурорининг кўрсатилган мурожаати асосида ушбу ишни кўриб чиққан. Кўриб чиқиш натижаларига кўра, Р.Ш.га нисбатан Жиноят ишлари бўйича Юнусобод туман судининг 2022 йил 22 декабрдаги ҳукми бекор қилинди. Р.Ш. Жиноят кодексининг 119-моддаси 4-қисмида назарда тутилган жиноятни содир этганликда айбдор деб топилиб, 15 йил муддатга озодликдан маҳрум этилди.
Биринчи инстанция ҳукмида жиноят содир этишга суиқасд (яъни тугалланган жиноят эмас, балки уни содир этишга суиқасд) назарда тутилган 25-модда орқали айблов илгари сурилган. Бироқ прокурорнинг шикоятидан сўнг, келтирилган важларга мувофиқ, апелляция суди бу суиқасд эмас, балки тугалланган жиноят, деб топиб, қонунда белгиланган тартибда жазони кучайтирди.
Изоҳ (0)