“Konstitutsiyani prinsipial o‘zgartirmasdan turib davlatni o‘zgartirib bo‘lmaydi” — adliya vaziri Akbar Toshqulov
Davlatning qurilishi birinchi o‘rinda konstitutsiya va qonunlarga asoslangan bo‘ladi. Bu haqda bugun, 28-mart kuni Adliya vazirligida bo‘lib o‘tgan matbuot anjumanida adliya vaziri Akbar Toshqulov aytib o‘tdi, deya xabar bermoqda “Daryo” muxbiri.
Anjumanda Akbar Toshqulov yangilanayotgan Konstitutsiya loyihasi haqida fikr bildirar ekan, qomusning eng katta o‘zgarishlaridan biri — inson huquqlarining mustahkamlanishi ekanligini aytdi.
“Aslida nimaga kerak konstitutsiyaga o‘zgartirish deganda, baʼzi moddalar bor, yaʼni to‘g‘ridan to‘g‘ri qo‘llanadigan juda ko‘p moddalar bor. Kelajakda davlatning qurilishi birinchi o‘rinda konstitutsiya va qonunlarga asoslangan bo‘ladi. Ana shu konstitutsiyani prinsipial o‘zgartirmasdan turib davlatni o‘zgartirib bo‘lmaydi. Buni rivojlangan davlatlarda ham ko‘rishingiz mumkin. Amerikaning tarixidagi siyosat nima uchun o‘zgargan desangiz, konstitutsiyaning falon moddasiga o‘zgartirish kiritganidan keyin hayot o‘zgargan. Xuddi shunday, bizda ham juda katta islohotlar amalga oshirilyapti va baʼzi islohotlarni konstitutsiyaga o‘zgartirish kiritmasdan turib amalga oshirib bo‘lmaydi”, — dedi adliya vazir.
Ma’lumot uchun, Oliy Majlis Senati 14-mart kuni bo‘lib o‘tgan majlisda yangi tahrirdagi Konstitutsiya to‘g‘risidagi qonun loyihasi bo‘yicha referendum o‘tkazish to‘g‘risidagi qarorni maʼqullagandi. Qonun loyihasi “Xalq so‘zi” va “Narodnoye slovo” gazetalarining 15-mart kungi sonida eʼlon qilindi. Qonun loyihasi 6 bo‘lim, 155 moddadan iborat. Konstitutsiyaviy qonun referendum natijalari Markaziy saylov komissiyasi tomonidan rasmiy eʼlon qilingan kundan eʼtiboran kuchga kiradi. Yangi konstitutsiya bo‘yicha referendum 30-aprelda o‘tkaziladi.
Eslatib o‘tamiz, 2021-yilda bo‘lib o‘tgan O‘zbekiston prezidenti sayloviga tayyorgarlik ko‘rish va uni o‘tkazish bilan bog‘liq xarajatlarni moliyalashtirish uchun 300 milliard so‘m ajratilgan edi.
