Америкаликларнинг банкларга бўлган ишончи сезиларли даражада пасайди

Америкаликларнинг атиги 10 фоизи Америка банклари ва бошқа молия институтларига “юқори даражадаги ишонч”га эга. Бу респондентларнинг 22 фоизи банкларга юқори ишонч билдирган 2020 йилга нисбатан анча паст. 

Бундай маълумотлар Associated Press ва Чикаго университетининг Жамоатчилик тадқиқотлари маркази (NORC) ҳамкорлигида ўтказилган ижтимоий сўровда келтирилган.

Сўров натижаларига кўра, америкалик катта ёшли одамларнинг 57 фоизи мамлакат банкларига “бир оз” ишонади, респондентларнинг 31 фоизи эса уларга “ишонмайди”. 

Сўров 16—20 март кунлари ўтказилди ва унда 1080 дан ортиқ америкалик иштирок этди. Сўров муаллифларининг қайд этишича, натижаларга бир неча банкларнинг қулаши билан боғлиқ вазият таъсир қилган. 

10 март куни эълон қилинган Калифорниядаги Силикон водийси банкининг (СВБ) қулаши 2008 йилдан бери АҚШдаги энг йирик банк инқирози бўлди. 

СВБдан кейин Нью-Йоркда жойлашган Signature Bank ҳам банкрот бўлиб, АҚШ тарихидаги учинчи йирик банк инқирозига айланди.

Америкаликлар бундай вазиятнинг сабабларидан бири АҚШ ҳукумати банк соҳасини тартибга солиш учун қўлидан келган барча ишни қилмаётганида, деб ҳисобламоқда. 

Респондентларнинг 56 фоизи ҳукумат банклар ва молия институтларини тартибга солиш бўйича етарли чора кўрмаётганини, 27 фоизи тартибга солиш етарли, 15 фоизи эса бу соҳани тартибга солиш ортиқча, деб ҳисоблаган. 

Шу билан бирга, америкаликларнинг қарийб 50 фоизи шахсий молиявий аҳволи яхши эканини кўрсатмоқда, бироқ респондентларнинг бир хил қисми келгуси йилда Қўшма Штатлардаги иқтисодий вазият ёмонлашишига ишонч билдирган.