Президент Шавкат Мирзиёев қарорига асосан, чекка ҳудудлардаги давлат мактабларида ишлаётган ўқитувчилар ойлик-маошларига оширилган устамалар тўлаб келинмоқда. Бунинг натижасида кўплаб ўқитувчилар даромадининг сезиларли ўсишига эришиляпти. Бухоронинг олис чўл овулидаги мактабда дарс бераётган физика фани ўқитувчиси Жамол Шаропов ҳудуддаги аҳвол ва таълим жараёни ҳақида “Дарё”га сўзлаб берди.
“Уйимдан 185 км узоқликдаги мактабга қатнайман”
27 йиллик тажрибага эга Жамол Шаропов 2021 йилдан бери Бухоро вилояти, Пешкў туманидаги 25-умумий ўрта таълим мактабида физика ва астрономия фанларидан дарс бериб келади.
Мактаб туманнинг чекка қисми ҳисобланадиган Жонгелдидаги Холота овулида, ўқитувчининг яшаш уйидан 185 км узоқликда, чўлда жойлашган. Жамол Шаропов аномал совуқ ёки иссиқ об-ҳаво шароитида ҳам ўз яшаш уйидан мактабга қатнаб, ишлайди.
“Овулдаги ҳаёт жуда сокин ва тинч. Аҳоли пункти Бухоро шаҳридан қарийб икки юз километр узоқликда, Қизилқум чўли бағрида жойлашган. Яқин атрофда аҳоли жуда ҳам сийрак, ўнлаб километрларда одам кўрмайсиз, катта чўл. Овул ҳаёти ўзига хос. Афсуски, бу ерда сув — катта муаммо. Фақат аҳоли учун ичимлик суви мавжуд. Деҳқончилик қилишга имкон йўқ. Маҳаллий аҳоли сони бир неча юз нафарни ташкил қилади. Улар чорва боқиш билан шуғулланади, қўй ва қорамол асрашади. Шунингдек, бу ерда туялар ҳам кўп боқилади. Дўконлар бор, аммо унча катта эмас, бозор узоқроқда. Жонгелдида ҳар ҳафта савдо ярмаркаси бўлади, жуда томошабоп жой. Баъзан бориб, нарсалар сотиб оламан”, – дея ҳикоя қилади муаллим.
“Ўғлимни тўлов-контракт асосида ўқитяпман”
Жамол Шаропов ўзининг мисолида ўқитувчиларга яратилаётган имкониятлар ҳақида гапириб, устозларни ҳар томонлама қўллаб-қувватлаш янгиланаётган конституцияда ҳам алоҳида мустаҳкамлаб қўйилаётганини урғулади.
“Конституцияга киритилаётган янги моддада давлат ўқитувчиларнинг шаъни ва қадр-қимматини ҳимоя қилиш, уларнинг ижтимоий ва моддий фаровонлиги, касбий жиҳатдан ўсиши тўғрисида ғамхўрлик қилиши белгилаб қўйилмоқда. Бу бизга жуда катта куч беради”, – дейди ўқитувчи.
Ҳозирда Жамол Шаропов ўртача 3,5—4 миллион сўм ойлик маоши олмоқда. У 1991–1996 йилларда Бухоро давлат университетини битирган. Олий маълумотли ўқитувчи ойлигига давлат томонидан 30 фоизгача устама тўланяпти.
Олис чўл ҳудудида яшаётган болаларга сабоқ бераётган устоз айни пайтда ўз фарзандини Бухоро озиқ-овқат ва енгил саноат институтида ўқитяпти.
“Ўғлимнинг контракти йилига 12,5—13 миллион сўм. Уни ойлик-маошимдан тўлаяпман. Мақсадим, фарзандим ўқишни битириб, яхши мутахассис бўлсин. Менга бундан ортиқ ютуқ йўқ, — дейди Жамол Шаропов.
“Мактабда ўқувчилар сони жуда оз”
Жамол Шароповнинг ҳикоя қилишича, овулдаги мактабда ўқувчилар сони жуда кам.
“Синфларда бор-йўғи бир неча нафардан ўқувчи ўқийди. Лекин шунга қарамай ҳар бир болага индивидуал ёндашамиз. Кўпроқ шуғулланиш, мавзуни батафсил ўрганиш учун қулайлик бор.
Ҳудуд узоқ, аҳоли кам бўлса-да, давлат томонидан мактабда зарур шароитлар яратилган. Ўзбекистоннинг қоқ ўртасидаги олис чўл қишлоғига ҳам таълим ислоҳоти шамоллари етиб келяпти”, — дея сўзларини якунлади суҳбатдош.
Изоҳ (0)