“Uydan 185 km uzoqlikdagi maktabga qatnab, dars beryapman” — olis cho‘l ovuliga borib ishlayotgan o‘qituvchi hikoyasi
Prezident Shavkat Mirziyoyev qaroriga asosan, chekka hududlardagi davlat maktablarida ishlayotgan o‘qituvchilar oylik-maoshlariga oshirilgan ustamalar to‘lab kelinmoqda. Buning natijasida ko‘plab o‘qituvchilar daromadining sezilarli o‘sishiga erishilyapti. Buxoroning olis cho‘l ovulidagi maktabda dars berayotgan fizika fani o‘qituvchisi Jamol Sharopov hududdagi ahvol va taʼlim jarayoni haqida “Daryo”ga so‘zlab berdi.
“Uyimdan 185 km uzoqlikdagi maktabga qatnayman”
27 yillik tajribaga ega Jamol Sharopov 2021-yildan beri Buxoro viloyati, Peshko‘ tumanidagi 25-umumiy o‘rta taʼlim maktabida fizika va astronomiya fanlaridan dars berib keladi.
Maktab tumanning chekka qismi hisoblanadigan Jongeldidagi Xolota ovulida, o‘qituvchining yashash uyidan 185 km uzoqlikda, cho‘lda joylashgan. Jamol Sharopov anomal sovuq yoki issiq ob-havo sharoitida ham o‘z yashash uyidan maktabga qatnab, ishlaydi.
“Ovuldagi hayot juda sokin va tinch. Aholi punkti Buxoro shahridan qariyb ikki yuz kilometr uzoqlikda, Qizilqum cho‘li bag‘rida joylashgan. Yaqin atrofda aholi juda ham siyrak, o‘nlab kilometrlarda odam ko‘rmaysiz, katta cho‘l. Ovul hayoti o‘ziga xos. Afsuski, bu yerda suv — katta muammo. Faqat aholi uchun ichimlik suvi mavjud. Dehqonchilik qilishga imkon yo‘q. Mahalliy aholi soni bir necha yuz nafarni tashkil qiladi. Ular chorva boqish bilan shug‘ullanadi, qo‘y va qoramol asrashadi. Shuningdek, bu yerda tuyalar ham ko‘p boqiladi. Do‘konlar bor, ammo uncha katta emas, bozor uzoqroqda. Jongeldida har hafta savdo yarmarkasi bo‘ladi, juda tomoshabop joy. Baʼzan borib, narsalar sotib olaman”, – deya hikoya qiladi muallim.
“O‘g‘limni to‘lov-kontrakt asosida o‘qityapman”
Jamol Sharopov o‘zining misolida o‘qituvchilarga yaratilayotgan imkoniyatlar haqida gapirib, ustozlarni har tomonlama qo‘llab-quvvatlash yangilanayotgan konstitutsiyada ham alohida mustahkamlab qo‘yilayotganini urg‘uladi.
“Konstitutsiyaga kiritilayotgan yangi moddada davlat o‘qituvchilarning shaʼni va qadr-qimmatini himoya qilish, ularning ijtimoiy va moddiy farovonligi, kasbiy jihatdan o‘sishi to‘g‘risida g‘amxo‘rlik qilishi belgilab qo‘yilmoqda. Bu bizga juda katta kuch beradi”, – deydi o‘qituvchi.
Hozirda Jamol Sharopov o‘rtacha 3,5—4 million so‘m oylik maoshi olmoqda. U 1991–1996-yillarda Buxoro davlat universitetini bitirgan. Oliy maʼlumotli o‘qituvchi oyligiga davlat tomonidan 30 foizgacha ustama to‘lanyapti.
Olis cho‘l hududida yashayotgan bolalarga saboq berayotgan ustoz ayni paytda o‘z farzandini Buxoro oziq-ovqat va yengil sanoat institutida o‘qityapti.
“O‘g‘limning kontrakti yiliga 12,5—13 million so‘m. Uni oylik-maoshimdan to‘layapman. Maqsadim, farzandim o‘qishni bitirib, yaxshi mutaxassis bo‘lsin. Menga bundan ortiq yutuq yo‘q, — deydi Jamol Sharopov.
“Maktabda o‘quvchilar soni juda oz”
Jamol Sharopovning hikoya qilishicha, ovuldagi maktabda o‘quvchilar soni juda kam.
“Sinflarda bor-yo‘g‘i bir necha nafardan o‘quvchi o‘qiydi. Lekin shunga qaramay har bir bolaga individual yondashamiz. Ko‘proq shug‘ullanish, mavzuni batafsil o‘rganish uchun qulaylik bor.
Hudud uzoq, aholi kam bo‘lsa-da, davlat tomonidan maktabda zarur sharoitlar yaratilgan. O‘zbekistonning qoq o‘rtasidagi olis cho‘l qishlog‘iga ham taʼlim islohoti shamollari yetib kelyapti”, — deya so‘zlarini yakunladi suhbatdosh.
