Ўзбекистон ва Малайзия ислом молияси бўйича мутахассислар тайёрлаш доирасида ҳамкорлик қилади

Ўзбекистон элчиси Равшан Усмонов Малайзия олий таълим вазири Моҳамед Халид Нордин билан учрашув ўтказди, деб хабар бермоқда “Дунё” агентлиги.

Қайд этилишича, суҳбат давомида олий таълим соҳасидаги ҳамкорликнинг истиқболлари, шу жумладан, Малайзиянинг ислом молияси бўйича илғор тажрибасини Ўзбекистонда татбиқ этиш масалалари муҳокама қилинган.

Моҳамед Халид Нордин Малайзияни икки давлат ўртасидаги маданият ва билим тизимлари кўприкларини янада кенгайтириш ва мустаҳкамлаш тарафдори эканлигини таъкидлаган.

“Малайзия ва Ўзбекистон ўртасида олий таълим соҳасидаги икки томонлама дўстона муносабатлар азалдан ривожланиб келмоқда. Малайзия томони олий таълим соҳасида икки давлат учун ўзаро манфаатли бўлган ҳар қандай ҳамкорликни, айниқса, олий таълим муассасалари ўртасидаги алоқаларни қўллаб-қувватлайди”, — дейди Моҳамед Халид Нордин.

Хорижий томон Ўзбекистон Банк-молия академияси (БМА) ва Малайзия Ютара университети ҳузуридаги Ислом бизнес мактаби ўртасида республикада ислом молиясини ривожлантириш ва ушбу соҳада мутахассисларни тайёрлаш бўйича ўрнатилган ҳамкорликни олқишлаган.

Учрашув якунида 2023 йилнинг июнь ойида Малайзия Ютара университети ҳузуридаги Ислом бизнес мактаби делегациясининг Ўзбекистонга амалий сафарини уюштириш ва республика мутахассислари учун семинар ҳамда тренинглар ўтказиш бўйича келишувга эришилган.

Марказий банк раиси Мамаризо Нурмуродов 2021 йил октябрь ойида Марказий банк бошқарувининг навбатдаги йиғилиш якунларига бағишланган матбуот анжуманида ислом молиясининг ҳуқуқий асослари қачон яратилиши ва тижорат банкларида ислом молияси дарчалари қачон иш бошлаши ҳақидаги саволга жавоб берганди. Унинг айтишича, мамлакатда “ислом молиясини ривожлантириш бўйича ишлар бошланган. 14 банкда ислом молияси дарчаларини ташкил этиш бўйича ишлар амалга ошириляпти. Бунда ислом молияси асосида кредит, депозитлар амалга оширилади”.