“Маъмурий жарималарни тўлашда аҳолига қўшимча қулайликлар яратиш ҳамда соҳада коррупсион омилларни бартараф этиш чора-тадбирлари тўғрисида”ги президент қарори қабул қилинди. Қарор матни “Дарё” таҳририятида мавжуд.
Қарорга мувофиқ, Мажбурий ижро бюроси томонидан қўлланадиган маъмурий жарима миқдори ижро ҳужжатида ундирилиши белгиланган суммадан юқори бўлиши мумкин эмаслиги белгиланди.
“Мажбурий ижро бюроси номидан маъмурий ҳуқуқбузарликлар тўғрисидаги ишларни кўриб чиқишга ҳамда маъмурий жазо қўллашга фақат Ўзбекистон Республикасининг Бош давлат ижрочиси, Қорақалпоғистон Республикаси, вилоятлар ва Тошкент шаҳрининг бош давлат ижрочилари, уларнинг ўринбосарлари, шунингдек, Мажбурий ижро бюросининг туман (шаҳар) бўлими бошлиқлари ҳақлидир”, — дейилади қарорда.
Шунингдек, ҳужжат билан Олий суд, Ички ишлар вазирлиги ва Адлия вазирлигининг судланганлик муддати тугалланиши ва уни олиб ташлаш йўналишида бюрократия ва сансоларлик ҳолатларига чек қўйиш, шунингдек, эскирган ва замон талабларига мос келмайдиган тартиб-таомилларни тубдан қисқартириш мақсадида соҳага проактив шаклдаги давлат хизматларини кўрсатиш тамойилларини жорий этиш тўғрисидаги таклифига розилик берилган.
2023 йил 1 сентябрдан бошлаб:
- судланганлик муддатининг ўтиб кетгани ёки судланганликнинг олиб ташланиши ҳақидаги маълумотлар Ички ишлар вазирлигининг “Тезкор маълумотлар” ягона ахборот тизимида автоматик равишда онлайн шакллантирилади;
- судланганлик муддатининг ўтиб кетгани ёки судланганликнинг олиб ташлангани ҳақидаги маълумотнома, судланганлик муддати тугаган ёки судланганлик олиб ташланган сананинг эртасидан кечиктирмасдан тегишли шахснинг Ягона интерактив давлат хизматлари порталидаги шахсий кабинетига автоматик равишда бепул юборилади.
Ички ишлар вазирлиги Олий суд, Бош прокуратура ва Рақамли технологиялар вазирлиги билан биргаликда 2023 йил 1 июлга қадар мазкур талаб ижросини таъминлаш билан боғлиқ барча зарур чораларни кўради.
Бунда, жумладан, “Электрон жиноий-ҳуқуқий статистика” ягона ахборот тизимида қуйидаги маълумотлар автоматик равишда акс эттирилишини таъминлаш йўлга қўйилади:
- Олий суд ва Ички ишлар вазирлигининг ахборот тизимларини ўзаро интеграция қилиш орқали судда ихтиёрий тўланган жарималар, суд қарорларини ижро этишда юзага келадиган масалаларни ҳал этиш билан боғлиқ материалларнинг кўрилиши ҳақидаги маълумотлар;
- Мажбурий ижро бюроси ва Ички ишлар вазирлигининг ахборот тизимларини ўзаро интеграция қилиш орқали ундирилган жарималар ҳақидаги маълумотлар;
- “Пробация ҳисоби” электрон базаси билан “Электрон жиноий-ҳуқуқий статистика” ягона ахборот тизимини ўзаро интеграция қилиш орқали пробация ҳисобидан озод этилган шахслар ҳақидаги маълумотлар.
Аввалроқ мазкур қарор билан Ўзбекистонда эндиликда барча жарималар вақтлироқ тўласа, чегирма берилиши маълум қилинганди.
Изоҳ (0)