Ўзбекистондаги 2 та университет дунёнинг топ-500 талик ОТМлари рейтингига киритилди
Quacquarelli Symonds — QS World University Rankings халқаро рейтинг агентлиги 2023 йилги дунё университетларининг “Фан соҳалари рейтинги” (Subject Rankings) натижаларини эълон қилди. Рейтингдан Ўзбекистоннинг икки университети ҳам ўрин олди, деб хабар беради Олий таълим, фан ва инновациялар вазирлиги.
Қайд этилишича, Ўзбекистон миллий университети ва “Тошкент ирригация ва қишлоқ хўжалигини механизациялаш муҳандислари” Миллий тадқиқот университети 4 та (замонавий тиллар, математика, физика ва астрономия, атроф-муҳит) фан бўйича топ-500 олий таълим муассасалари қаторидан ўрин эгаллаган.
Бундан ташқари, Ўзбекистон олийгоҳлари илк бор соҳалар бўйича рейтингда иштирок этган. “Тошкент ирригация ва қишлоқ хўжалигини механизациялаш муҳандислари” Миллий тадқиқот университети “Муҳандислик ва технология” соҳаси бўйича рейтингда 451–500-ўрин ва “Табиий фанлар” бўйича 501–520-ўринни эгаллади.
Маълумот учун, Ўзбекистон миллий университети 2022 йилги рейтингда “Математика” соҳасида 451–500-ўринда кўрилган бўлса, бу йил шу йўналиш бўйича 100 поғона юқорига кўтарилган.
QS World University Rankings by Subject — дунё университетларини 51 та фан соҳаси бўйича иш берувчилар ва халқаро илмий жамият ўртасида ўтказиладиган сўровнома, яъни фан соҳаларида олий таълим муассасасининг нуфузи, Scopus халқаро илмий-техник маълумотлар базасида нашр этилган илмий мақолаларга иқтибослар ва Xirsh индекси, шунингдек халқаро ҳамкорлик кўрсаткичларини International Research Network (IRN) маълумотларининг баҳоланишини назарда тутади.
Эслатиб ўтамиз, 2019 йилнинг октябрида президент Шавкат Мирзиёев 2030 йилгача олий таълим тизимини ривожлантириш концепциясини тасдиқловчи қарорга имзо чеккан эди. Унга кўра, Ўзбекистон Миллий университети ва Самарқанд давлат университетини илғор университетларга айлантириш ва улардаги таълим даражасини дунёнинг 500 та энг яхши университетлари қаторига қўшиш режалаштирилган.
