Байрамни кўчат экишдан бошлаган ҳоким, дошқозонда тайёрланган 8 тонналик сумалак: Андижондаги Наврўз шодиёналаридан репортаж

Барча вилоятларда бўлгани каби шарқона янги йил — Наврўз айёми Андижон вилоятида ҳам кўтаринки кайфиятда нишонланди. Айём муносабати билан вилоятнинг барча шаҳар ва туманларида, корхона ва ташкилотлар, муассаса ва маҳаллаларда концерт дастурлари, сайиллар ва спорт беллашувлари ўтказилди. Вилоятнинг марказий тадбири ва ҳудудларда ўтказилган Наврўз тантаналарида иштирок этган “Дарё” мухбирлари байрам сайилларининг энг қизиқ жиҳатларини тасвирга олди.

Байрам тантаналари Янги Андижон массивида ўтказилган “Яшил макон” кўчат экиш акциясидан бошланди. Мазкур массивдаги 6 гектар ер майдонига вилоят ҳокими Шуҳратбек Абдураҳмонов бошчилигида корхона ва ташкилотларнинг ходимлари, имом-хатиблар, отинойилар, нуронийлар, ёшлар томонидан 5 минг тупдан ортиқ дарахт кўчатлари экилди.

Ҳудудлардаги боғ ва хиёбонларда ўтказилган байрам тантаналари ва халқ сайилларида вилоят ҳокими Шуҳрат Абдураҳмонов иштирок этиб, иштирокчиларни байрам билан қутлади ҳамда миллий ҳунармандчилик буюмлари, баҳорий таомлар кўргазмалари билан танишди.

Байрам дастурларида халқ ўйинлари, фолклор санъатининг энг сара намуналари, ўлан-лапарлар, бадиий ҳаваскорлик жамоалари, дорбозлар, цирк артистлари, оилавий ансамбллар, бахшилар, шоирлар ўз чиқишларини намоён қилдилар. Асака ва Булоқбоши туманларида улоқ-кўпкари, Балиқчи тумани ҳамда Хонобод шаҳрида кураш мусобақалари ташкил этилди.

Байрам тадбирида таниқли санъаткорлар, ёш ижрочилар, фолклор гуруҳлари, бадиий ҳаваскорлик жамоалари томонидан халқона куй-қўшиқлар, ўлан-лапарлар айтилди.

Вилоят бўйлаб ўтган байрам тадбирларида Илҳом Иброҳимов, Мирзабек Холмедов, Баҳодир Мамажонов, Отабек Муҳаммадзоҳид, Шаҳло Рустамова, Дилшод Раҳмонов, Озода Нурсаидова каби санъаткорлар байрамона кайфият улашди.

Избоскан туманидаги Лоғумбек маданият ва истироҳат боғида ўтказилган байрам тантаналарида туман ҳокимлиги ташаббуси билан махсус тайёрланган дошқозонда 8 тонналик сумалак пиширилиб, иштирокчиларга тарқатилди.

Ҳокимлик ахборот хизмати ходими Абдуносир Мамажоновнинг айтишича, сумалакни тайёрлаш учун жами 5,5 тонна буғдой, 4,5 тонна ун, 2 минг литр пахта ёғи, 7 минг литр сув, 200 килограмм тош ва 20 килограмм ёнғоқ сарфланган.

Андижонда Наврўз байрамига бағишланган сайиллар ва тадбирлар давом этмоқда.