Bayramni ko‘chat ekishdan boshlagan hokim, doshqozonda tayyorlangan 8 tonnalik sumalak: Andijondagi Navro‘z shodiyonalaridan reportaj

Barcha viloyatlarda bo‘lgani kabi sharqona yangi yil — Navro‘z ayyomi Andijon viloyatida ham ko‘tarinki kayfiyatda nishonlandi. Ayyom munosabati bilan viloyatning barcha shahar va tumanlarida, korxona va tashkilotlar, muassasa va mahallalarda konsert dasturlari, sayillar va sport bellashuvlari o‘tkazildi. Viloyatning markaziy tadbiri va hududlarda o‘tkazilgan Navro‘z tantanalarida ishtirok etgan “Daryo” muxbirlari bayram sayillarining eng qiziq jihatlarini tasvirga oldi.

Bayram tantanalari Yangi Andijon massivida o‘tkazilgan “Yashil makon” ko‘chat ekish aksiyasidan boshlandi. Mazkur massivdagi 6 gektar yer maydoniga viloyat hokimi Shuhratbek Abdurahmonov boshchiligida korxona va tashkilotlarning xodimlari, imom-xatiblar, otinoyilar, nuroniylar, yoshlar tomonidan 5 ming tupdan ortiq daraxt ko‘chatlari ekildi.

Hududlardagi bog‘ va xiyobonlarda o‘tkazilgan bayram tantanalari va xalq sayillarida viloyat hokimi Shuhrat Abdurahmonov ishtirok etib, ishtirokchilarni bayram bilan qutladi hamda milliy hunarmandchilik buyumlari, bahoriy taomlar ko‘rgazmalari bilan tanishdi.

Bayram dasturlarida xalq o‘yinlari, folklor sanʼatining eng sara namunalari, o‘lan-laparlar, badiiy havaskorlik jamoalari, dorbozlar, sirk artistlari, oilaviy ansambllar, baxshilar, shoirlar o‘z chiqishlarini namoyon qildilar. Asaka va Buloqboshi tumanlarida uloq-ko‘pkari, Baliqchi tumani hamda Xonobod shahrida kurash musobaqalari tashkil etildi.

Bayram tadbirida taniqli sanʼatkorlar, yosh ijrochilar, folklor guruhlari, badiiy havaskorlik jamoalari tomonidan xalqona kuy-qo‘shiqlar, o‘lan-laparlar aytildi.

Viloyat bo‘ylab o‘tgan bayram tadbirlarida Ilhom Ibrohimov, Mirzabek Xolmedov, Bahodir Mamajonov, Otabek Muhammadzohid, Shahlo Rustamova, Dilshod Rahmonov, Ozoda Nursaidova kabi sanʼatkorlar bayramona kayfiyat ulashdi.

Izboskan tumanidagi Log‘umbek madaniyat va istirohat bog‘ida o‘tkazilgan bayram tantanalarida tuman hokimligi tashabbusi bilan maxsus tayyorlangan doshqozonda 8 tonnalik sumalak pishirilib, ishtirokchilarga tarqatildi.

Hokimlik axborot xizmati xodimi Abdunosir Mamajonovning aytishicha, sumalakni tayyorlash uchun jami 5,5 tonna bug‘doy, 4,5 tonna un, 2 ming litr paxta yog‘i, 7 ming litr suv, 200 kilogramm tosh va 20 kilogramm yong‘oq sarflangan.

Andijonda Navro‘z bayramiga bag‘ishlangan sayillar va tadbirlar davom etmoqda.