Ҳиндистоннинг Ааkash Healthcare компанияси Тошкентда замонавий тиббиёт шаҳарчаси барпо этишга тайёргарлик кўрмоқда, деб хабар беради “Дунё” АА.
Маълум қилинишича, компаниянинг бошқарувчи директори доктор Аашиш Чаудри Livemint.com янгиликлар порталига мазкур тиббиёт тармоғининг яқин келажакдаги режалари ҳақида сўзлаб берган.
“Биз Ўзбекистон вакиллари билан Англашув меморандумини имзоладик. Ўта замонавий инфратузилма, тиббий асбоб-ускуналар, малакали шифокор ва тиббиёт ходимларига эга замонавий шифохона қуриш учун бизга 10 гектар ер ажратилади”, — деган у суҳбат чоғида.
Ҳиндистонлик шифокорлар янги Ааkash Health Medicity шаҳарчасида, шунингдек, тиббиёт коллежлари, хусусан, ҳамширалар тайёрлайдиган ўқув муассасини жойлаштиришни режалаштирмоқда.
Маълумот учун, Деҳли шаҳрида жойлашган Ааkash Healthcare шифохонаси замонавий инфратузилма ва энг сўнгги технологиялар билан жиҳозланган, бу ерда малакали шифокорлар ва бошқа тиббиёт ходимлари фаолият юритади. Ушбу тиббиёт муассасаси ортопедик ва бўғимларни алмаштириш жарроҳлиги соҳасидаги етакчи хизматлари билан ном қозонган.
Шунингдек, кардиология ва юрак жарроҳлиги, она ва бола, умумий ва минимал фойдаланиш жарроҳлиги, офталмология, неврология, нейрохирургия, буйрак тадқиқотлари ва бошқа йўналишларда илғор тажриба марказлари фаолияти йўлга қўйилган.
2022 йилнинг ноябрида Тошкентнинг Учтепа туманида мазкур тиббиёт тармоғининг умумий қиймати 10 миллион долларлик бўлган кўп тармоқли тиббиёт клиникаси ташкил этилган. “Янги лойиҳага 100 миллион доллар сармоя жалб этилиши, 3 мингга яқин иш ўрни яратилиши кутилмоқда”, деб ёзади Ҳиндистон ОАВ.
Изоҳ (0)