Дошқозонлардаги сумалак, 40 қозондаги ош, тандирдан узилган кўк сомса: Фарғонадаги Наврўз тантаналари — суратларда

Фарғона вилоятининг барча туман ва шаҳарларида Наврўзи олам — шарқона янги йил муносабати билан халқ сайиллари, томоша ва концертлар бўлиб ўтмоқда. Вилоятнинг асосий байрам тантаналари Фарғона шаҳридаги Ислом Каримов номидаги театр-концерт саройи хиёбонида халқ сайли тарзида ўтказилди. Бу ҳақда “Дарё” мухбири Азизжон Эрматов хабар бермоқда.

Хиёбон эрта тонгданоқ минглаб фарғоналиклар билан гавжум бўлди. Байрам иштирокчилари карнай-сурнай садолари остида кутиб олинди.

Халқ сайиллари спортчи ёшларнинг кўргазмали чиқишлари, дор ва миллий ўйинлар мусобақалари билан бошланди. Кураш, тош кўтариш, арқон тортиш, варраклар сайли, халқ амалий санъати — фольклор намуналари, бир-биридан мазали миллий таомлар танловлари ўтказилди.

Сайилларда вилоятдаги қирғиз, тожик, рус ҳамда корейс миллий маданий марказлари фаоллари ҳам ўз одат ва анъаналари акс этган чиқишлари билан иштирок этди.

Байрам тадбирида вилоятдаги туман ва шаҳарлар томонидан махсус павильонлар ташкил этилиб, ўша ҳудудга хос урф-одатлар кўрсатиб берилди, миллий таомлар ва ҳунармандчилик маҳсулотлари кўргазмалари намойиш этилди. Сайил иштирокчиларига чалпак ва баҳорий таомлар тортиқ қилинди.

Хиёбон бўйлаб ўрнатилган 15 та дошқозонда Наврўзнинг шоҳ таоми — сумалак қайнади, 40 та қозонда ош дамланди, 40 та тандирда эса кўк сомсалар ёпилиб, байрам иштирокчиларига тарқатилди.

Сайил давомида улкан қозонда икки ярим тонна ош дамланди, 10 метрли торт ва 10 метрли пицца тайёрланди. Ўзбекистондаги энг узун – 55 метрлик лаваш тайёрлаш жараёнини ҳам юзлаб сайил иштирокчилари катта қизиқиш билан кузатди.

Фолклор гуруҳлари, халқ ансамбллари томонидан халқона куй-қўшиқлар, ўлан-лапарлар ижро этилди.

Байрам тантаналарида вилоят ҳокими Хайрулло Бозоров иштирок этиб, байрам декорациялари, миллий ҳунармандчилик буюмлари, баҳорий таомлар кўргазмалари билан танишди.

Ботир Қодиров, Нилуфар Усмонова, Гуласал Абдуллаева, Илҳом Иброҳимов, Яҳёбек Мўминов каби таниқли санъаткорлар, ёш ижрочилар, бадиий ҳаваскорлик жамоалари иштирокидаги концерт дастури фарғоналикларга байрамона кайфият улашди.

Боғ ва хиёбонларда байрам тантаналари ва халқ сайиллари давом этмоқда.