Россия Гаагадаги Халқаро жиноий судни (ХЖС) ва унинг юрисдиксиясини тан олмайди, деди Россия президентининг матбуот котиби Дмитрий Песков журналистларга. У бу ҳақда Гаага Россиянинг Украинага босқини юзасидан иккита жиноий иш қўзғатишга тайёргарлик кўраётгани ҳақидаги саволга жавобан айтди.
“Умуман олганда, биз кўп йиллар давомида на халқаро суд органлари, ҳатто биз тан олмайдиганлар ҳам, халқаро ҳамжамиятнинг бошқа аъзолари ҳам Донбассда уюштирилган фуқаролик инфратузилмасини вайрон қилиш, украин миллатчилари томонидан тинч аҳолини ўлдириш ҳаракатларига эътибор қаратмаганини эслатишдан чарчамаймиз”, — дея қўшимча қилди Кремль матбуот котиби.
13 март куни The New York Times газетаси манбаларига таяниб, Гаагадаги Халқаро жиноий суд Украинага босқин пайтида содир этилган жиноятлар туфайли Россияга қарши иккита иш очмоқчи эканини хабар қилди. Улардан бири украиналик болаларнинг ўғирланиши, иккинчиси фуқаролик инфратузилмасига қасддан қилинган ҳужумлар билан боғлиқ.
Бу ишларда айбланувчи ким бўлиши ҳозирча аниқ эмас. Агар айбловлар қўйилса, бу Украинадаги жиноятлар учун россиялик амалдорларни халқаро судда таъқиб қилишга биринчи уриниш бўлади. Шу билан бирга, газетага интервью берган экспертлар бу жараённинг амалга ошиши даргумон эканини айтган, чунки ХЖС ишни сиртдан кўрмайди, Россия эса айбланувчини топширмайди.
Бир йил муқаддам ХЖС Украинада 2013 йил 21 ноябрдан, “Евромайдон” воқеалари бошланганидан бери содир этилган ҳарбий жиноятлар ва инсониятга қарши жиноятлар бўйича тергов бошлаганини эълон қилганди. Бу ХЖСда иштирок этувчи 39 давлатнинг мурожаатидан кейин содир бўлди. Ташкилотнинг 42 нафар ходими Украинага юборилган.
Изоҳ (0)