Хитой раиси Си Цзиньпин 20—22 март кунлари давлат ташрифи билан Россияда бўлади, деб хабар бермоқда “Интерфакс” Кремл матбуот хизматига таяниб.
Си Цзиньпин Россия президенти Владимир Путиннинг таклифига биноан Москвага ташриф буюрмоқда. “Музокаралар чоғида Си ва Путин Россия ва Хитой ўртасидаги ҳар томонлама шериклик ва стратегик ҳамкорликни янада ривожлантиришнинг долзарб масалаларини муҳокама қилади”, — дейилади Кремл хабарида.
Хитой Ташқи ишлар вазирлиги Си Цзиньпиннинг Россияга ташрифи “икки давлат ўртасидаги муносабатлар ривожига янги суръат бағишлайди, ўзаро ишонч ва тушунишни янада мустаҳкамлайди”, деб хабар қилган. Вазирликнинг қўшимча қилишича, Пекин “Украина инқирози бўйича объектив позицияни сақлаб қолган ҳолда, музокараларни илгари суришда конструктив рол ўйнаш ниятида”.
Хитой раҳбарининг Россияга ташрифи ҳақида бир неча кун олдин Reuters манбалари хабар берганди. Агентлик маълумотларига кўра, Хитой Россиянинг Украинага босқини бир йиллиги муносабати билан “Украина инқирозини сиёсий йўл билан ҳал қилиш” режасини тақдим этганидан сўнг, Пекин ўзаро музокаралар ўтказишга ҳам қарор қилган.
Россиядаги музокаралардан сўнг Си Цзиньпин Украина президенти Владимир Зеленский билан уруш бошидан бери илк суҳбатини ўтказмоқчи, дейди Reuters манбалари. Учрашув онлайн ўтказилиши кутилмоқда.
Си Цзиньпин ва Владимир Путин охирги марта 2022 йил декабрь ойи охирида музокара ўтказган, уларнинг учрашуви онлайн тарзда бўлиб ўтган.
Февраль ойида АҚШ расмийлари Хитой Россияга ноҳарбий ёрдам кўрсатаётгани, шунингдек, қурол етказиб бериш имкониятини ҳам кўриб чиқаётгани ҳақида айтганди. ОАВ хабарларига кўра, агар Пекин Москвага ҳарбий ёрдам берса, АҚШ Хитойга қарши санкциялар жорий этишга тайёр.
Politico маълумотларига кўра, 2022 йилда Хитойнинг бир қатор компаниялари Россияга қурол-яроғ, жумладан, автоматлар, дрон қисмлари ва зирҳли нимчалар жўнатган.
Изоҳ (0)