Ўзбекистон U-20 терма жамоаси бош мураббийи Равшан Ҳайдаров ёшлар ўртасидаги Осиё Кубоги финали олдидан матбуот анжуманида иштирок этди.
Эртанги ўйин ҳақида:
Эртага бизни муҳим ўйин кутиб турибди. Мазкур учрашувга режа бўйича тайёргарлик олиб бордик, эртага ўзимизнинг ўйинимизни намойиш этиб, мусобақа ғолиблигини қўлга киритмоқчимиз.
Тажриба ва унинг аҳамияти ҳақида:
Ҳа, мен ва мураббийлар штабим бу каби мусобақалар ҳамда финал учрашувларида аввал ҳам иштирок этганмиз. Бу тажриба бизга ёрдам беради, буни футболчиларга ҳам сингдириб боришга ҳаракат қиляпмиз. Бироқ биласиз, эртанги финал бошқа тарих ва биз унга масъулият билан тайёргарлик кўряпмиз.
Ўтган ўйинлар давомида жуда кўп куч ва эмоция йўқотдик. Ҳозирда тикланиш жараёнини давом эттирган ҳолда эътиборимизни фақат ўйинга қаратганмиз.
Мухлислар ва ўйин услуби ҳақида:
Албатта улар бизга қўшимча куч бағишламоқда. Биз улар билан янада кучлимиз. Эртанги ўйинда ҳам уларни хурсанд қилишни ният қилганмиз.
Ҳозирда жисмоний ва теоретик тайёргарликни давом эттиряпмиз. Финалга жисмоний ва руҳий яхши ҳолатда етиб бориш муҳим ҳисобланади. Таркибга келсак, ким тайёр бўлса, ўша майдонга тушади.
Ҳужум чизиғи ҳақида:
Футболда гол уриш энг муҳим нарса ва бу ўзига яраша қийин ҳисобланади. Ҳа, биз Австралия ва Кореяга қарши ўйинларда кўплаб вазиятлар яратдик, бироқ уларни голга айлантиришда муаммолар бўлди.
Якуний нуқтани қўйишда камчиликларимиз бор. Лекин олдимизда Жаҳон чемпионатига қадар вақт бор. Барча вазиятларни ҳали кўриб чиқамиз ва таҳлил қиламиз. Бу йўналишда албатта ўз устимизда ишлаймиз.
Жамоанинг жисмоний ҳолати ҳақида:
Ўтган ўйинлар шуни кўрсатдики, биз бу йўналишда тўғри йўлдамиз. Мураббийлар штаби жисмоний тайёргарлик бўйича яхши ишламоқда. Айтганимдек, куч йўқотдик, бироқ тикланиш жараёни тезкорлик билан бошланган ва ҳозир ҳам давом этмоқда. Эртага бизга мухлисларнинг қўллаб-қувватлаши, иштиёқ ва масъулият албатта ёрдам беради.
Рақиб футболчилари ҳақида:
Мен айнан қайсидир бир футболчини алоҳида кўрсатмоқчи эмасман. Улар жамоавий яхши ҳаракат қиладилар. Ва биз ҳам режани шунга яраша қиламиз. Айнан бир футболчига қарши эмас, жамоага қарши тайёргарлик ва режа тузамиз.
Изоҳ (0)