Ўзбекистон касаба уюшмалари Федерацияси томонидан Қорақалпоғистоннинг Бўзатов туманида “Бўзатов” санаторийси қурилиши бошланмоқда. Бу ҳақда Жўқорғи Кенгес матбуот хизмати хабар берди.
Хусусан, мазкур лойиҳага касаба уюшмалари федерацияси томонидан 123 миллиард сўм йўналтирилиб, лойиҳа учун 7,2 гектар ер майдони ажратилган, Лойиҳа натижасида 120 иш ўрни яратилиши белгиланган.
Касаба уюшмалари федерациясининг маълум қилишича, санаторий олти қаватдан иборат бўлиб, 2-қаватидан 6-қаватигача бўлган қисмида ётоқ хоналари жойлашади. Шунингдек, ўтов кўринишидаги коттежлар, кутубхона, маданият маскани, тренажёр хоналари, ошхона бинолари, ходимлар учун бинолар барпо этилади.
200 та ўринли санаторийнинг қурилиш ишлари 2024 йилнинг 2-чорагида якунлаш режалаштирилган. Санаторий овқат ҳазм қилиш аъзолари касалликлари, урологик ва гинекологик, неврологик, эндокринологик, шу жумладан, қандли диабетга чалинган беморларни соғломлаштириш йўналишида иш олиб боради.
Таъкидланишича, Бўзатов туманида энг замонавий янги санаторий барпо этилиши ташаббуси президент Шавкат Мирзиёевнинг 2020 йил 2 октябрь куни Қорақалпоғистон Республикасига ташрифи давомида Ўзбекистон касаба уюшмалари Федерацияси томонидан илгари сурилган ва бу борада тегишли топшириқлар берилган.
Изоҳ (0)