Тошкент шаҳар ҳокими вазифасини бажарувчи Бахтиёр Раҳмонов БААнинг Abu Dhabi Sewerage Services Company бошқарувчи ва бош ижрочи директори Аҳмад Ал Шамси бошчилигидаги компания мутасаддилари билан учрашди. Бу ҳақда пойтахт ҳокимлиги матбуот хизмати хабар берди.
Учрашувда Abu Dhabi Sewerage Services Company ҳамкорлари — FICHTER Water & Transportation Gmbh (Германия) ва MARUBENI CORPORATION (Япония) компанияcи масъуллари, “Ўзсувтаъминот” АЖ раиси Соҳиб Саифназаров, шаҳар ҳокими ўринбосарлари ҳамда “Тошкент шаҳар сув таъминоти” МЧЖ мутасаддилари иштирок этган.
Ўзаро мулоқот давомида Тошкент вилояти Қуйи Чирчиқ туманининг “Сурум” МФЙ ҳудудида барпо этилиши режалаштирилган Оқава сувларни йиғиш ва тозалаш иншоотини лойиҳалаш, қуриш, зарурий инфратузилмани яратиш, мавжуд тизимлар билан интеграция қилишга оид ташкилий ва техник масалалар атрофлича кўриб чиқилган.
Аҳмад Ал Шамси лойиҳа ҳақида маълумот берар экан, бугунги кунда Abu Dhabi Sewerage Services Company қатори, FICHTER Water & Transportation Gmbh (Германия) ва MARUBENI CORPORATION (Япония) компанияларининг масъул мутахассислари иш олиб бораётганини билдирган.
Ҳозирда мутахассислар иншоот лойиҳаси ва дизайни борасида ишлаётганини айтиб, бунинг учун шаҳарнинг ўсиш суръатлари, аҳоли сони ва бунинг яқин келажакка оид прогнози ҳам муҳимлигини таъкидлаган. Шунингдек, 4 йилга мўлжалланган ушбу лойиҳа икки компонентдан иборатлиги ҳамда икки босқичда амалга оширилишини, тайёр бўлганда умумий ҳисобда суткасига 1,5 миллион метр куб оқава сувларни қабул қилиб, тозалашини билдирган. Унинг ишга туширилиши “Салар”, “Бектемир” ва қисман “Бўзсув” иншоотларига йўналтирилаётган оқава сувларни тўлиқ қамраб олишини қайд этилган.
Бахтиёр Раҳмонов бу Тошкент учун ниҳоятда аҳамиятли лойиҳалардан бири эканига эътибор қаратиб, уни мукаммал қилиб тайёрлаш ҳамда ишга тушириш учун шаҳар ҳокимлигида керакли барча мутахассислардан иборат Ишчи гуруҳини ташкил этиш таклифини илгари сурган. Аҳмад Ал Шамси бу таклифни қўллаб-қувватлаган ва томонлар амалий мулоқотларда давом этишга келишиб олган.
Аввалроқ республика аҳолисини марказлашган ичимлик суви билан таъминлаш даражаси 77 фоизга етказилиши тўғрисида хабар берилганди. Йилдан йилга ўтувчи 54 та ва янгидан бошланувчи 17 та объектда 105 та иншоот ва 1,4 минг километр ичимлик сув ва оқова сув тармоқлари қурилади.
Изоҳ (0)