Раҳматуллоҳ домла Сайфуддинов яна имомликка қайтди. Бу ҳақда “Дарё” манбаси хабар берди.
Раҳматуллоҳ Сайфуддинов 2021 йил октябрда Тошкент шаҳар бош имом-хатиби этиб тайинланганди. 2022 йилнинг январида ўз хоҳиши билан соғлиғидаги муаммолар сабаб лавозимини тарк этган.
Маълум қилинишича, Сайфуддинов эндиликда фақат “Минор” масжиди имоми сифатида фаолиятини давом эттиради. Ушбу масжидда имом-хатиб бўлиб ишлаб келаётган Тошкент бош имом-хатиби Абдуқаҳҳор Юнусов эса “Шайх Зайниддин” (Кўкча) масжидига имом-хатиб этиб тайинланган. Мусулмонлар идораси Тошкент шаҳар вакиллиги ҳам “Шайх Зайниддин” масжидига кўчирилган. Ҳозирча мазкур маълумот расман эълон қилинмади.
Маълумот учун, Раҳматуллоҳ Сайфуддинов 1975 йил 18 майда Сурхондарё вилояти Музработ туманида туғилган. 1992-1995 йилларда ўрта мактабни тугатгач, Бухоро шаҳридаги Мир Араб мадрасасида таҳсил олди. 1995–1997 йилларда талабалик даврида Тошкент шаҳри Шайхонтоҳур туманидаги “Оқ туникали” жоме масжидида имом-хатиблик қилган.
2001–2003 йилларда Имом Бухорий номидаги Тошкент ислом институтида дарс берган. 2003 йилда Эронда ўтказилган ХIX Халқаро Қуръон мусобақасида иштирок этган. Фаолияти давомида Тошкент шаҳридаги “Хўжа Аламбардор”, “Минор” жоме масжидларида имом-хатиб, янги тайинланишигача эса Юнусобод тумани бош имом-хатиби ва Юнусобод тумани “Мирза Юсуф” масжиди имом-хатиби лавозимларида ишлаган.
Изоҳ (0)