Ўзбекистон Туркиядаги зилзила маркази бўлган Ҳатай вилояти ҳудудида уй-жой, мактаб ва бир қанча объектлар қуради. Бу ҳақда Президент матбуот хизмати хабар берди.
Хабарга кўра, Шавкат Мирзиёев Туркий давлатлар ташкилотининг навбатдан ташқари саммитидаги нутқида бу ҳақда маълум қилган. Президент Ҳатай вилоятининг Овакент уй-жойлар, замонавий мактаб ва инфратузилма объектлари қурилишини айтиб, бу келгусида яқин дўстлик ва бирдамликнинг ёрқин тимсолига айланишини таъкидлаган.
“Барчамиз сизларга мададкор бўлиб, зилзила оқибатида вайрон бўлган шаҳар ва қишлоқларни, ижтимоий ва саноат объектларини тиклаш ва янгиларини барпо этиш ишларига бор кучимизни йўналтиришга тайёрмиз. Жумладан, биз зилзила марказларидан бири бўлган ва қутқарувчиларимиз иш олиб борган Ҳатай вилоятининг Овакент ҳудудидаги бунёдкорлик ишларига муносиб ҳисса қўшиш ниятидамиз. Биз барпо этмоқчи бўлган кўркам уй-жойлар, замонавий мактаб ва инфратузилма объектлари келгусида том маънода яқин дўстлик ва бирдамлигимизнинг ёрқин тимсолига айланишига аминман”, — дейди Шавкат Мирзиёев.
Бундан ташқари, талафот кўрган ҳудудлардан ёши улуғ инсонлар ва нуронийларнинг Ўзбекистонда соғлиғини тиклаши ва дам олиши, шунингдек, Имом Бухорий, Имом Термизий, Имом Мотуридий, Баҳоуддин Нақшбанд каби буюк аждодлар қадамжоларини зиёрат қилиши учун барча қулай шарт-шароитлар яратиб берилади.
“Бу гуруҳларга Ташкилот Оқсоқоллар кенгаши бошчилик қилса, мақсадга мувофиқ бўлар эди. Шу билан бирга, ушбу ёз мавсумида биз Ҳатай ёшларининг ҳам Ўзбекистонга ташрифини ташкил этмоқчимиз. Уларнинг мазмунли ҳордиқ чиқаришлари ҳамда қадимий Самарқанд, Бухоро ва Хива шаҳарларига сафарларини, юртимиздаги ўз тенгдошлари билан қўшма тадбирларни ўтказиш ниятидамиз”, — дейди президент ўз нутқида.
Изоҳ (1)
факат узбекистон курмасин