O‘zbekiston Turkiyadagi zilzila markazi bo‘lgan Hatay viloyati hududida uy-joy, maktab va bir qancha obyektlar quradi. Bu haqda Prezident matbuot xizmati xabar berdi.
Xabarga ko‘ra, Shavkat Mirziyoyev Turkiy davlatlar tashkilotining navbatdan tashqari sammitidagi nutqida bu haqda maʼlum qilgan. Prezident Hatay viloyatining Ovakent uy-joylar, zamonaviy maktab va infratuzilma obyektlari qurilishini aytib, bu kelgusida yaqin do‘stlik va birdamlikning yorqin timsoliga aylanishini taʼkidlagan.
“Barchamiz sizlarga madadkor bo‘lib, zilzila oqibatida vayron bo‘lgan shahar va qishloqlarni, ijtimoiy va sanoat obyektlarini tiklash va yangilarini barpo etish ishlariga bor kuchimizni yo‘naltirishga tayyormiz. Jumladan, biz zilzila markazlaridan biri bo‘lgan va qutqaruvchilarimiz ish olib borgan Hatay viloyatining Ovakent hududidagi bunyodkorlik ishlariga munosib hissa qo‘shish niyatidamiz. Biz barpo etmoqchi bo‘lgan ko‘rkam uy-joylar, zamonaviy maktab va infratuzilma obyektlari kelgusida tom maʼnoda yaqin do‘stlik va birdamligimizning yorqin timsoliga aylanishiga aminman”, — deydi Shavkat Mirziyoyev.
Bundan tashqari, talafot ko‘rgan hududlardan yoshi ulug‘ insonlar va nuroniylarning O‘zbekistonda sog‘lig‘ini tiklashi va dam olishi, shuningdek, Imom Buxoriy, Imom Termiziy, Imom Moturidiy, Bahouddin Naqshband kabi buyuk ajdodlar qadamjolarini ziyorat qilishi uchun barcha qulay shart-sharoitlar yaratib beriladi.
“Bu guruhlarga Tashkilot Oqsoqollar kengashi boshchilik qilsa, maqsadga muvofiq bo‘lar edi. Shu bilan birga, ushbu yoz mavsumida biz Hatay yoshlarining ham O‘zbekistonga tashrifini tashkil etmoqchimiz. Ularning mazmunli hordiq chiqarishlari hamda qadimiy Samarqand, Buxoro va Xiva shaharlariga safarlarini, yurtimizdagi o‘z tengdoshlari bilan qo‘shma tadbirlarni o‘tkazish niyatidamiz”, — deydi prezident o‘z nutqida.
Izoh (1)
факат узбекистон курмасин