Россиялик 31 ёшли Михаил Коротков йиллар давомида Россия президенти Владимир Путиннинг махфий поездини кузатиб келган ва уни камераларига муҳрлаган. The Washington Post нашри фотографнинг суратларини намойиш қилди.
Путин Россия ҳудудлари бўйлаб саёҳат қилганда айнан шу транспорт турини афзал кўради. Тасвирларда Путиннинг шахсий рақамлари бўлмаган ва ойналари доим ёпиқ бўлган ҳашаматли зирҳли поездини кўриш мумкин.
“Мен фотографликка жудаям шўнғиб кетдим. Камёб кадрларни олишга ҳаракат қилдим. Мен учун талаб шунчалик катта эдики, оқибатлари ҳақида ўйламагандим”, — деган фотограф.
Поезд вагонлардан бирининг тепасида ғайриоддий гумбаз бўлиб, у ерда махсус алоқа ускуналари ўрнатилгани ҳақида тахминлар бор. Коронавирус пандемияси даврида Коротков Путин поездининг қатнови кескин ошганини айтди.
“Зирҳли поезд ақлдан озганлардай шошиларди, бошқа режалаштирилган поездлар эса унга йўл берарди. Оддий одамлар бундай поездда юрмайди”, — дейди у.
Коротковнинг ҳамкасблари Путиннинг махсус поезди Москвадан жўнаб кетса, унга хабар берган ва Коротков ўз камераси билан релсга шошган. У Путин поездининг кўплаб суратларини олган, бироқ интернетга бир нечтасини жойлаган.
“Мавзуга жуда қизиққаним учун эътиборни жалб қилмасликка ҳаракат қилардим”, — деди у ва бу унинг севимли машғулотининг юқори чўққиси эканини айтди.
Лондонда жойлашган Досе маркази Путин маъмуриятига яқин бўлган исми ошкор этилмаган манбага таяниб, Путин 2021 йилдан буён поезддан кўпроқ фойдаланаётганини, чунки уни самолётлар каби кузатиб бўлмаслигини айтди. Путин энг кўп ташриф буюрадиган жойларда, жумладан, 2015 йилда Москва яқинидаги Ново-Огарёво, 2017 йилда Сочи ва 2019 йилда Валдайда махфий станциялар ва ўзаро боғловчи линиялар қурилган.
2021 йил май ойида Коротковнинг YouTube саҳифасида ғалати хабарлар пайдо бўлган. Унда у ва дўстининг шахсий телефон суҳбатлари, пиёда саёҳатлари матни жойланган.
“Изоҳларимда ўша суҳбатларни кўрганимда, бу даҳшатли эди”, — деди у ва бу уни Федерал хавфсизлик хизмати кузатаётган бўлиши мумкинлигини билдирганини айтди. Коротков изоҳларни уни тўхтатувчи огоҳлантириш сифатида қабул қилди.
“Шахсий хавфсизлигим ҳақида ўйладим ва ўша пайтдан бошлаб интернетда эълон қилган ҳамма нарса менга қарши ишлатилиши мумкинлигини англадим”, — деди у. Унинг 11 йил давомида поездларни кузатиш ҳақидаги блогидан олган болалик қувончи кулга айланди.
“Ота-онамга ҳаётим хавф остида эканини айтдим”, — дейди Коротков.
Коротков учун 2022 йил оғир йил бўлган. Россия Украинага бостириб кирган куни у ўз квартирасида ойна синиши ва тутун ҳидидан уйғонган. Унинг остидаги квартирадаги ёнғин, Россия ҳужуми билан деярли бир вақтда бошланган. Босқин уни ҳайратда қолдирган. У буни қаттиқ қўллаб-қувватлаган ота-онаси билан баҳслашмасликка ҳаракат қилганини айтди.
У поездларни кузатиш постлари орқали саботаж ёки террорчиликда айбланиб қамоққа олиниши мумкинлигидан қўрққан. Март ойида у “шахсий хавфсизлиги” учун блогини ёпган.
Путиннинг сентябрдаги ҳарбий сафарбарлиги ниҳоят уни ҳаракатга келтирган ва бир неча кун ичида у ота-онасининг қолиш ҳақидаги илтимосларини рад этиб, Россиядан қочиб кетган.
“Энг қийини муҳожирлик ягона ечим эканини англаб етиш ва ўтган ҳаётимдан воз кечиб, нолдан бошлаш эди”, — дейди у.
Коротков Москвадан машинада Қозоғистонга йўл олган. У яшаб турган икки манзилга икки марта ҳарбий хизматга чақирув қоғози етиб келганида, Коротков Қозоғистон чегарасидан ўтиб кетган ва Ҳиндистонга жўнаб кетган.
Ҳозир у Шри-Ланкадаги пляж яқинида яшайди ва рус компанияси учун онлайн IT курсларини ўтказади.
“Мен оиламни соғиндим. Бу Россияда қолдирган ягона нарсам”, — дейди у.
2011 йилда у блог юритишни бошлаганида, бу Россия ҳокимияти билан келишмовчиликка олиб келишини орзу қилмаган. Ҳозирги кунда Коротков поездлар ўрнига самолётларни кузатиб юради, хориждаги ҳаёти акс этган ранг-баранг видеоларни эълон қилади. Унинг камераси линзалари ҳайвонлар, автобуслар, самолётлар, ҳаракатдаги одамлар ва кичик инсоний лаҳзаларни топишга интилади.
Изоҳ (0)