Навоий вилояти Хатирчи туманида бюджет маблағларини талон-торож қилган халқ таълими бўлими мансабдорларига нисбатан жиноят иши қўзғатилди. Бу ҳақда Коррупцияга қарши курашиш агентлиги хабар берди.
Маълум қилинишича, Навоий вилоятида яшовчи фуқаро Н.О.нинг Хатирчи тумани халқ таълими бўлими мансабдор шахсларининг хатти-ҳаракатларидан ҳамда бўлимдаги ижтимоий-маънавий муҳитдан норози бўлиб, Президент виртуал қабулхонасига йўллаган мурожаатлари агентлик томонидан кўриб чиқилган.
Ўрганиш натижасига кўра, муаллифнинг шикоятлари ҳамда тўпланган ҳужжатлар ваколат доирасида кўриб чиқиш учун тегишли идораларга юборилган.
Шунга асосан Бош прокуратура ҳузуридаги Иқтисодий жиноятларга қарши курашиш департаментининг Навоий вилоят бошқармаси томонидан ўтказилган терговга қадар текширишда ушбу ХТБ мансабдор шахслари ўзаро жиноий тил бириктириб, 2022 йилнинг июнь-декабрь ойларида 43,6 миллион сўм миқдоридаги рағбатлантириш ва иш ҳақларини ноқонуний ҳисоблаб, бюджет маблағларини талон-торож қилгани аниқланган.
Ҳолат юзасидан 26 февраль куни ушбу шахсларга нисбатан Жиноят кодексининг 167-моддаси 2-қисм “г” банди билан жиноят иши қўзғатилган.
Ҳозирда мазкур жиноят иши доирасида прокуратура идоралари томонидан тергов ҳаракатлари олиб борилмоқда.
Изоҳ (0)