Сиз кўриб турган бу кадрлар Ўзбекистоннинг чекка ҳудудидаги абгор йўллар эмас, пойтахт Тошкент шаҳрининг қоқ марказидаги Чилонзор туманига қарашли маҳаллалардаги ҳолатлардан бири. Туманнинг “Дўмбиробод” маҳалласи, Дўмбиробод кўчасида яшовчи аҳоли вакиллари “Дарё”га мурожаат қилиб, салкам икки ой аввал бошланган йўл таъмири уларга номаълум сабабларга кўра тўхтаб қолганини, айни кунда чала ташлаб кетилган йўл таъмиридан азият чекаётганини, хонадонига автомобилда кириб-чиқолмаётганини айтиб, ОАВ орқали масъулларга мурожаат қилмоқчилигини билдирди.
“Дарё” вазиятни ўрганиш мақсадида Чилонзор туманининг “Дўмбиробод” маҳалласидаги ўша абгор кўчага борди.
“Кўчамизни асфалт қилиб берамиз деб, 2023 йилнинг январь ойи охирида ковлаб, ишни бошлашганди. Бир ҳафтада якунлаб берамиз дейилган иш мана 40 кундан ошдики, якунламади. Маҳаллада яшовчи одамлар уйига рўзғор қилиши керак, қолаверса машинаси борлар уйига кириб-чиқиши лозим. Йўл ковлаб ташлангани ва шағал тўкилгани боис, юриб бўлмайдиган аҳволга келган. Шу сабаб бозор қилиб келсак ҳам ёки уйга қайтсак ҳам машинани катта кўча бўйида қолдириб, ичкарига пиёда кириб келишимизга тўғри келмоқда. Мазкур муаммо сабаб туман ҳокимлигига бир неча маротаба оғзаки мурожаат қилдик. Масъул белгиланган экан, аммо у иш бугун битади, эрта битади дейишдан нарига ўтмаяпти”, — дейди шу кўчада яшовчи Акмал Розиқов.
Суҳбатдошнинг айтишича, кўчанинг эски аҳволи аҳоли фойдаланиб туриши учун яроқли ҳолатда бўлган. Масъулларнинг таъмирлаймиз дея борини ҳам бузиб ташлаши аҳоли норозилигига сабаб бўлган.
“Ҳозир кўчамизга машина кириб-чиқолмайди. Йўлимизнинг эски асфалти ҳарқалай уйимизга кириб-чиқиб туришга яраб турганди. Энди эса бори ҳам йўқ бўлди. Раҳбарият шуни аниқ режа асосида қилганида, яъни қачон бетон қилиш режалаштирилиб, маблағ ажратилган бўлса ўша пайтда эски йўлимизни бузишганида айни муддао бўларди. Биз бундай муаммога дуч келмас эдик. Ҳозир эски ҳолати ҳам йўқ, янги ҳолати эса чала ташлаб кетилган. Бундан фақат шу кўчада яшовчилар азият чекмоқда”, — дейди суҳбатдош.
Шу кўчада яшовчиларнинг туман ҳокимлигида ишловчилар ва иш бажарувчига таяниб маълумот беришича, бу кўчани таъмирлаш учун масъуллар ва иш бажарувчи ўртасида ҳеч қандай шартнома имзоланмаган. Маблағ муаммоси ҳал этилмаган.
“Шу кўча таъмирини бошлаган қурувчи билан гаплашсак бу ишни бажариш бўйича иш берувчи ва иш бажарувчи ўртасида ҳеч қандай шартнома ҳам қилинмаган экан. Қурувчи кўчамиз таъмирини бошлаб қўйганини, шағал тўкилганини, эндиликда бетон қуйиш ишлари режалаштирилганини айтмоқда. Аммо қурувчи ҳам у билан ҳеч ким шартнома қилмагани сабаб, эртага бажарган ишига куйиб қолмаслиги учун ишни тўхтатиб турганини айтди”, — дейди Акмал Розиқов.
Шу кўчада яшовчи яна бир фуқаро Шаҳобиддин Тўлагановнинг айтишича, қўшниларидан бирининг тоби қочганлиги боис, тез ёрдам чақирилган. Бироқ тез ёрдам автомобили кўчага киролмагани сабаб қўни-қўшнилар беморни кўтариб, тез ёрдам машинасига олиб боришига тўғри келган.
“Бунақа ҳолат ярим тунда содир бўлса нима бўларди? Ўша оғир беморга тез ёрдам автомобили ўз вақтида етиб келолмаса, ичкарига киролмаса нима бўларди? Майли, кундуз куни бўлса, қўни-қўшнилар кўмак беради. Лекин ҳар доим ҳам қўшнилар ёрдам беролмайди-ку. Нега мутасаддилар бу ҳолатга бефарқ?”, — дейди Шаҳобиддин Тўлаганов.
Мурожаатчиларнинг айтишича, масъуллар йўл таъмири кечикаётгани ҳақидаги такрорий мурожаатларга “икки кунда ҳал бўлади, уч кунда ҳал бўлади”, деган навбатчи жавоблар бериш билан кифояланмоқда.
“Масъулларнинг иши шу даражада суст бўлса, бир ишни якунига етказиш учун нечадир ой кутилиши керак бўлса нега эски, фойдаланиб турган йўлимизни бузиб ташлашди? Янги йўл қуриш бунчаликка чўзилар экан, эски йўлга тегишмаса бўларди-ку. Йўлимиз қачон битади деб сўрасак, икки кунда битади, уч кунда битади деган шунчаки жавоблар билан чекланишмоқда”, — дейди суҳбатдош.
Аҳолининг аниқлаштиришича, улар йўл таъмири бўйича Тошкент шаҳар ҳокимлиги ташаббуси билан бошланган “Халқ назорати” платформасига ҳам мурожаат қилган.
“Ёнимиздаги кўчалар таъмирланганини кўриб, бизнинг таъмирталаб кўчамиз ҳам таъмирланса яхши бўларди деб, ‘Халқ назорати’га мурожаат қилдик. Учинчи мурожаатимиздан сўнг йўлимиз таъмирланишини айтишди ва борини ҳам бузиб, мана шунақа аҳволга келтириб қўйишди. Қачон бу ҳолат ўнгланади буниси бизга қоронғи”, — дейди Шаҳобиддин Тўлаганов.
“Дарё” журналистининг бу ҳақидаги саволларига жавоб берган масъул — Чилонзор тумани ҳокимлигининг қурилиш бўлими етакчи мутахассиси Шерзод Содиқов муаммо 2023 йилнинг 20 март кунига қадар ҳал этилишини маълум қилди.
“Бу кўча таъмири президент қарорига кўра, дастурга киритилган бўлиб, 2022 йилнинг декабрь ойида якунланиши керак эди. Йил якуни ва йил боши совуқ келгани боис, қурилиш-таъмирлаш ишлари кечиктирилди. Кеча бу ҳолат бўйича Ягона буюртмачи инжиниринг компанияси ва пудратчи ‘Ҳасан-Мустафо инвест’ масъуллари билан суҳбатлашдик. Суҳбат якунига кўра, ‘Дўмбиробод’ маҳалласининг Дўмбиробод кўчаси таъмири эртага давом эттирилади ва 2023 йилнинг 20 март кунига қадар таъмирланиб, тайёр ҳолатга келтирилиши маълум бўлди”, — дейди туман ҳокимликнинг қурилиш бўлими етакчи мутахассиси Шерзод Содиқов.
Изоҳ (0)