Siz ko‘rib turgan bu kadrlar O‘zbekistonning chekka hududidagi abgor yo‘llar emas, poytaxt Toshkent shahrining qoq markazidagi Chilonzor tumaniga qarashli mahallalardagi holatlardan biri. Tumanning “Do‘mbirobod” mahallasi, Do‘mbirobod ko‘chasida yashovchi aholi vakillari “Daryo”ga murojaat qilib, salkam ikki oy avval boshlangan yo‘l taʼmiri ularga nomaʼlum sabablarga ko‘ra to‘xtab qolganini, ayni kunda chala tashlab ketilgan yo‘l taʼmiridan aziyat chekayotganini, xonadoniga avtomobilda kirib-chiqolmayotganini aytib, OAV orqali masʼullarga murojaat qilmoqchiligini bildirdi.
“Daryo” vaziyatni o‘rganish maqsadida Chilonzor tumanining “Do‘mbirobod” mahallasidagi o‘sha abgor ko‘chaga bordi.
“Ko‘chamizni asfalt qilib beramiz deb, 2023-yilning yanvar oyi oxirida kovlab, ishni boshlashgandi. Bir haftada yakunlab beramiz deyilgan ish mana 40 kundan oshdiki, yakunlamadi. Mahallada yashovchi odamlar uyiga ro‘zg‘or qilishi kerak, qolaversa mashinasi borlar uyiga kirib-chiqishi lozim. Yo‘l kovlab tashlangani va shag‘al to‘kilgani bois, yurib bo‘lmaydigan ahvolga kelgan. Shu sabab bozor qilib kelsak ham yoki uyga qaytsak ham mashinani katta ko‘cha bo‘yida qoldirib, ichkariga piyoda kirib kelishimizga to‘g‘ri kelmoqda. Mazkur muammo sabab tuman hokimligiga bir necha marotaba og‘zaki murojaat qildik. Masʼul belgilangan ekan, ammo u ish bugun bitadi, erta bitadi deyishdan nariga o‘tmayapti”, — deydi shu ko‘chada yashovchi Akmal Roziqov.
Suhbatdoshning aytishicha, ko‘chaning eski ahvoli aholi foydalanib turishi uchun yaroqli holatda bo‘lgan. Masʼullarning taʼmirlaymiz deya borini ham buzib tashlashi aholi noroziligiga sabab bo‘lgan.
“Hozir ko‘chamizga mashina kirib-chiqolmaydi. Yo‘limizning eski asfalti harqalay uyimizga kirib-chiqib turishga yarab turgandi. Endi esa bori ham yo‘q bo‘ldi. Rahbariyat shuni aniq reja asosida qilganida, yaʼni qachon beton qilish rejalashtirilib, mablag‘ ajratilgan bo‘lsa o‘sha paytda eski yo‘limizni buzishganida ayni muddao bo‘lardi. Biz bunday muammoga duch kelmas edik. Hozir eski holati ham yo‘q, yangi holati esa chala tashlab ketilgan. Bundan faqat shu ko‘chada yashovchilar aziyat chekmoqda”, — deydi suhbatdosh.
Shu ko‘chada yashovchilarning tuman hokimligida ishlovchilar va ish bajaruvchiga tayanib maʼlumot berishicha, bu ko‘chani taʼmirlash uchun masʼullar va ish bajaruvchi o‘rtasida hech qanday shartnoma imzolanmagan. Mablag‘ muammosi hal etilmagan.
“Shu ko‘cha taʼmirini boshlagan quruvchi bilan gaplashsak bu ishni bajarish bo‘yicha ish beruvchi va ish bajaruvchi o‘rtasida hech qanday shartnoma ham qilinmagan ekan. Quruvchi ko‘chamiz taʼmirini boshlab qo‘yganini, shag‘al to‘kilganini, endilikda beton quyish ishlari rejalashtirilganini aytmoqda. Ammo quruvchi ham u bilan hech kim shartnoma qilmagani sabab, ertaga bajargan ishiga kuyib qolmasligi uchun ishni to‘xtatib turganini aytdi”, — deydi Akmal Roziqov.
Shu ko‘chada yashovchi yana bir fuqaro Shahobiddin To‘laganovning aytishicha, qo‘shnilaridan birining tobi qochganligi bois, tez yordam chaqirilgan. Biroq, tez yordam avtomobili ko‘chaga kirolmagani sabab qo‘ni-qo‘shnilar bemorni ko‘tarib, tez yordam mashinasiga olib borishiga to‘g‘ri kelgan.
“Bunaqa holat yarim tunda sodir bo‘lsa nima bo‘lardi? O‘sha og‘ir bemorga tez yordam avtomobili o‘z vaqtida yetib kelolmasa, ichkariga kirolmasa nima bo‘lardi? Mayli, kunduz kuni bo‘lsa, qo‘ni-qo‘shnilar ko‘mak beradi. Lekin har doim ham qo‘shnilar yordam berolmaydi-ku. Nega mutasaddilar bu holatga befarq?”, — deydi Shahobiddin To‘laganov.
Murojaatchilarning aytishicha, masʼullar yo‘l taʼmiri kechikayotgani haqidagi takroriy murojaatlarga “ikki kunda hal bo‘ladi, uch kunda hal bo‘ladi”, degan navbatchi javoblar berish bilan kifoyalanmoqda.
“Masʼullarning ishi shu darajada sust bo‘lsa, bir ishni yakuniga yetkazish uchun nechadir oy kutilishi kerak bo‘lsa nega eski, foydalanib turgan yo‘limizni buzib tashlashdi? Yangi yo‘l qurish bunchalikka cho‘zilar ekan, eski yo‘lga tegishmasa bo‘lardi-ku. Yo‘limiz qachon bitadi deb so‘rasak, ikki kunda bitadi, uch kunda bitadi degan shunchaki javoblar bilan cheklanishmoqda”, — deydi suhbatdosh.
Aholining aniqlashtirishicha, ular yo‘l taʼmiri bo‘yicha Toshkent shahar hokimligi tashabbusi bilan boshlangan “Xalq nazorati” platformasiga ham murojaat qilgan.
“Yonimizdagi ko‘chalar taʼmirlanganini ko‘rib, bizning taʼmirtalab ko‘chamiz ham taʼmirlansa yaxshi bo‘lardi deb, ‘Xalq nazorati‘ga murojaat qildik. Uchinchi murojaatimizdan so‘ng yo‘limiz taʼmirlanishini aytishdi va borini ham buzib, mana shunaqa ahvolga keltirib qo‘yishdi. Qachon bu holat o‘nglanadi bunisi bizga qorong‘i”, — deydi Shahobiddin To‘laganov.
“Daryo” jurnalistining bu haqidagi savollariga javob bergan masʼul — Chilonzor tumani hokimligining qurilish bo‘limi yetakchi mutaxassisi Sherzod Sodiqov muammo 2023-yilning 20-mart kuniga qadar hal etilishini maʼlum qildi.
“Bu ko‘cha taʼmiri prezident qaroriga ko‘ra, dasturga kiritilgan bo‘lib, 2022-yilning dekabr oyida yakunlanishi kerak edi. Yil yakuni va yil boshi sovuq kelgani bois, qurilish-taʼmirlash ishlari kechiktirildi. Kecha bu holat bo‘yicha Yagona buyurtmachi injiniring kompaniyasi va pudratchi ‘Hasan-Mustafo invest’ masʼullari bilan suhbatlashdik. Suhbat yakuniga ko‘ra, ‘Do‘mbirobod’ mahallasining Do‘mbirobod ko‘chasi taʼmiri ertaga davom ettiriladi va 2023-yilning 20-mart kuniga qadar taʼmirlanib, tayyor holatga keltirilishi maʼlum bo‘ldi”, — deydi tuman hokimlikning qurilish bo‘limi yetakchi mutaxassisi Sherzod Sodiqov.
Izoh (0)