Қорақалпоғистоннинг Қўнғирот туманида Nexia-3 юк машинаси билан тўқнашиши оқибатида беш киши ҳалок бўлди. Бу ҳақда Қорақалпоғистон ИИВ хабар берди.
Маълум қилинишича, воқеа 4 февраль куни А-380 Ғузор—Бухоро—Нукус—Бейнеу автомобиль йўлининг “Жаслиқ” посёлка фуқаролар йиғинидан ўтган қисмида юз берган. Nexia-3 ҳайдовчиси Қўнғирот тумани йўналиши бўйлаб ҳаракатланиб кетаётганида бошқарувини йўқотиб, қарама-қарши йўналишда ҳаракатланиб кетаётган Mercedes-Benz юк машинаси билан тўқнашиб кетган.
“Круз.уз”нинг маълумот беришича, ЙТҲ оқибатида 5 киши — икки эркак ва уч нафар аёл вафот етган. Уларнинг барчаси “Жаслиқ” посёлкасида яшаган.
Ҳолат юзасидан Қорақалпоғистон Республикаси ИИВ қошидаги Тергов бошқармаси томонидан Жиноят кодексининг 266-моддаси 3-қисми “а” банди (транспорт воситалари ҳаракати ёки улардан фойдаланиш хавфсизлиги қоидаларини бузиш одамлар ўлимига сабаб бўлиши) банди билан жиноят иши қўзғатилиб, тергов ҳаракатлари олиб борилмоқда.