Ўзбекистон аҳолиси эҳтиёжи учун Украина компанияси ишлаб чиқарадиган юқори сифатли дорилар етказилади

Украинанинг йирик фармацевтика компанияси билан ўзаро ҳамкорликни кенгайтириш масалалари муҳокама қилинди, деб хабар бермоқда “Дунё” АА.

Қайд этилишича, Ўзбекистоннинг Киевдаги элчихонаси томонидан фармацевтика соҳасида Украина билан ўзаро ҳамкорликни ривожлантириш мақсадида йирик дори-дармон маҳсулотлари ишлаб чиқарадиган “Кусум фарм” компанияси раҳбарлари Раджив Гупта ва Шейх Имран билан учрашув уюштирилди.

Суҳбат давомида компания раҳбарияти билан Ўзбекистонга қўшимча инвестисиялар киритиш ҳамда барпо этилаётган заводда Европа стандартларини татбиқ қилиш масалалари билан бирга Ўзбекистон аҳолиси эҳтиёжи учун Украинада ишлаб чиқарилаётган юқори сифатли дори воситаларини етказиш билан боғлиқ масалалар атрофлича муҳокама қилинди.

“Кусум” компаниялар гуруҳи ҳозирги пайтда Ўзбекистонга 5 миллион АҚШ долларидан зиёд миқдорда инвестиция киритган бўлиб, GMP стандартлари асосида дори воситаларини ишлаб чиқарадиган завод қурмоқда.

Украинанинг мазкур компанияси “Кусум” компаниялар гуруҳининг таркибидаги ширкат бўлиб, у Украинанинг Суми вилоятида Европа стандартлари асосида дори воситаларини ишлаб чиқариш билан шуғулланади.

Ушбу компаниялар гуруҳи Ҳиндистонда учта, Украинада битта ишлаб чиқариш заводига ҳамда иккита илмий-тадқиқот марказига эга. Унда икки минг нафардан зиёд юқори малакали ходимлар фаолият кўрсатади.