Тошкент шаҳрида “Рёдан” ҳаракатига алоқадорликда гумонланган 50 га яқин ўсмир ушлангани ҳақида хабар берилганди. Пойтахт ИИББ хабарига кўра, уларга қарши бўлган бир гуруҳ вояга етмаганлар “Антирёдан” ҳаракатини ҳам жорий этишган.
Маълум бўлишича, ўттиздан ортиқ ёшлар “Антирёдан” ҳаракатини ташкил қилиб, бузғунчилик ғояларини илгари сураётганларга қарши курашмоқчи бўлган. “Биз алоҳида гуруҳ ташкил қилдик. Унда ‘Рёдан’ ҳаракати ғоялари абсурд, ҳеч қандай фойда келтирмаслиги ва давлатга хавф туғдириши мумкинлиги ҳақида гап боради”, — дейди гуруҳ аъзоси.
“Ўртоқларимиз билан кўчада кетаётганимизда 2-3 йигит ёнимизга келиб, сизлар ‘Рёдан’мисизлар деб сўради. Ҳа, деганимизда бизни уришмоқчи эди. Йўқ, у нима дегани деб сўрадик. Шундан сўнг бизга бу ҳақда қисқа маълумот беришди. Уйга боргандан кейин бу ҳаракат ҳақида интернетдан тўлиқроқ маълумот олдим.
Ўрганиш жараёнида ҳаракат аъзолари динимиз, давлатимиз ҳақида ёмон гаплар гапирганини кўрдик. Энг ёмони, улар кўчада кетаётган ёшларга пичоқ бериб, одамларга қарши чиқиш кераклигини, уриб пичоқлаш кераклигини уқтирган. Шундан сўнг ўртоғим билан ‘Антирёдан’ ҳаракатини тузиш хаёлимизга келди. Telegram’да гуруҳ очдик ўттизтача одам йиғилди. У ерга битта рёданчи қўшилиб олиб, якшанба куни барчангизни йўқ қиламиз деб дўқ-пўписа қилди”, — дейди гуруҳ асосчиларидан бири.
Изоҳ (0)