“Онани қандай қадрлаш кераклигини ҳаммага ўргатиб кетди”. Instagram’да Фарҳод Маннопов хотирланмоқда

Ижтимоий тармоқларда машҳур бўлган “Mittivine” жамоаси асосчиси Фарҳод Маннопов 5 март куни эрта тонгда вафот этди. Маълумотларга кўра у бассейнда сузиш жараёнида бошидан олган жароҳати туфайли операция қилинган, аммо комадан сўнг ўзига кела олмаган.

Ижтимоий  тармоқларда марҳум Фарҳод Манноповнинг операциядан 20 минут олдинги видеоси тарқалди. 

“Ҳамма ҳол-аҳвол сўраб ёзганларга раҳмат. Шифокорнинг олдига келдим. Аввал ҳам бурнимни тўғрилатгани шифокорга келаман деб юргандим, шунақа сабаб бўлиб келдим. 20 дақиқадан сўнг операцияга кираман, дуо қилинглар”, — деган марҳум сўнгги видеосида. 

“Mittivine” асосчиси Фарҳод Манноповнинг дафн маросимида 10 мингдан ортиқ инсон иштирок этди. 

Шунингдек, ижтимоий тармоқларда вайнернинг 23 февраль куни вайн учун олинган видеоси тарқалди, унда Фарҳод Маннопов яқинларига сўнгги сўзини айтаётган аскар ролини ижро этган.

“Mittivine” жамоаси аъзоси, “Тўлаганофф” номи билан машҳур бўлган вайнер ҳамдардлик билдирган ҳаммага миннатдорчилик билдирди.

“Ҳаммага раҳмат. Фарҳодни охирги манзилга кузатиб келдик. Нимадир қилса, айтмасдан ҳайрон қолдирарди. Қаергадир кетаётган бўлсак ҳам айтмас эди, ўша куни айтарди. Охирги манзилига ҳаммани ҳайрон қолдириб кетди. Жуда кўпчилик келди, ҳурмат қилиб келганларга раҳмат”, — дейди вайнер. 

Маълумот ўрнида, Фарҳод Маннопов 2020 йилда яқин дўсти Улуғбек Шодибеков билан “Mittivine” жамоасига асос солган. Фарҳод Маннопов отасиз камбағаллик ва қийинчиликда вояга етган.

Вайнернинг онаси уни ва опасини ёлғиз ўзи тарбия қилган. Шу сабабли у ижтимоий тармоқларда онани қадрлаш, ҳурмат қилиш кераклиги ҳақида такрор ва такрор гапирар, ўз онасини турли хил совғалар билан хурсанд қилишга уринарди. У онасининг туғилган кунига янги уй ва Tracker автомобилини совға қилган эди.

Ўзбек шоу-бизнесининг кўплаб таниқли вакиллари, вайнерлар ва марҳум Фарҳод Маннопов яқинлари ҳам у билан боғлиқ хотираларни ёдга олди.

“Mittivine” жамоаси аъзоси Улуғбек Шодибеков яқин дўсти, марҳум Фарҳод Манноповнинг хотирасига атаб пост қолдирди.

“Ҳамма нарса биз ўйлаганимиздек бўлмас экан. Барчаси Яратганнинг қўлида, қачон олиб, қачон беришини ўзи биларкан. Ҳаммаси учун сенга раҳмат. Сендан кўп нарсани ўргандик. Сен ҳақиқий лидер эдинг, жамоа асосчиси, ҳар қанақа вазиятда суянчиқ эдинг. Дўстим, биздан рози бўл, биз сендан мингдан-минг розимиз”, — дейди вайнер Улуғбек Шодибеков. 

Хонанда Муниса Ризаева марҳум вайнернинг яхши амаллар қилгани ҳақида гапириб, инсонларни бир-бирига қадрлашга чақирди.

“Раҳматли Фарҳод Манноповни танимас эдим, лекин кўп яхши амаллар қилгани кўриниб турибди. Аллоҳ раҳматига олган бўлсин. Биздан фақат яхшилик қолади, яқин инсонларингизни қадрланг, улар бугун бор, эртага йўқ”, — деб изоҳ қолдирган Муниса Ризаева.

“Афандининг қизлари” кулги жамоаси аъзоси, актриса Муборак Абдуллаева ҳам марҳум Фарҳод Маннопов билан боғлиқ хотиралари ҳақида гапириб берди.

“Ишонишни хоҳламаяпман. Фарҳод ҳаммани кулдириб, ўзига ўргатиб, йиғлатиб кетди”, — дейди Муборак Абдуллаева.

Марҳумнинг дафн маросимида иштирок этган инстаблогер Жавоҳир Расулов ўз саҳифасида унга атаб пост қолдирди.

“У кулиб ётибди, тўлишган, сарғайган, кўзларининг ости қорайган. Лекин бари бир кулиб ётибди. Ҳамма йиғласа, у ҳамон кулиб ётибди”, — дейди вайнер.

Хонанда Рухшона ҳам марҳум вайнернинг ҳамкасблари ва яқинларига сабр тилади.

“Эрталабдан ёмон хабар. Яқинда ишқилиб бурниз синмадими, деб ёзгандим. Кўнгли очиқ Фарҳод шунда ҳам кулиб жавоб берганди. Ўлим ҳақ, аммо бевақт кетди”, — деб пост қолдирган Рухшона.

Инстаблогер, марҳум вайнернинг яқин дўсти Тимур Алихонов ҳам унга атаб пост қолдирди.

“Аристократлар” кулги жамоаси аъзоси Жаҳонгир Хўжаев Фарҳод Манноповнинг яхши, самимий инсон бўлганини таъкидлаб, унинг оила аъзоларига сабр тилади.

Актёр Азамат Аҳроров вайнер ҳақидаги хотираларини мухлисларига гапириб берди.

“Бугун туришим билан кўзимга ишонмадим, мен улар билан таниш эмасдим, бироқ ижтимоий тармоқдаги саҳифаларига кирсам, маза қилиб қувонардим. Жойинг жаннатдан бўлсин, Фарҳод”, — дейди актёр.

Инстаблогер Хонзода Қамбарова марҳум Фарҳод Маннопов блогерлар ичида энг яхшиси бўлганини айтиб, у ҳақда фикрини билдирди.

“Эртага нима бўлишини ҳеч ким билмайди. Оилангизга сабр тилайман, яхши инсон эдингиз, блогерларнинг ичида энг яхшиси“, — дейди Ханна.

“Аристократлар” кулги жамоасининг яна бир аъзоси Обиджон Насриддинов марҳум вайнер ҳақидаги хотираларини обуначиларига сўзлаб берди. 

“Бугун кўзимни уйқудан очишим билан битта хабар билан уйғондим. Хаёлимга яшин тезлигида миллион хил хаёллар қуйилиб келди. Наҳотки шунчалик жонимиз қил устида?

Кечагина соппа-соғ инсонлар бугун ўз омонатини топширяпти. Ўтганларни кимдир ижтимоий тармоқларда белгилаб, ҳамдардлик билдирса, энди ундан нима фойда? Шуни ростан тириклигида хурсанд қил, деган нарса бўларди. Бугунги воқеа қаттиқ таъсир қилди”, — деб изоҳ қолдирган Обиджон Насриддинов. 

“Maxимум” кулги жамоаси аъзоси Неъмат Ахмедович ҳам марҳум Фарҳод Маннопов ҳақидаги фикрларини билдирди.

“Фарҳод ақлий ва инсоний томонлама жуда тараққий этган инсон эди. Фикрлаши бошқаларга ўхшамайдиган, тўғри ва аниқ позицияни доим танлай билган лидер, фаҳм-фаросатли, кўнгли тоза, позитив йигит сифатида хотирамга муҳрладим. Чунки мен уни шундай кўрдим ва танидим”, — дейди у ўз постида. 

Актриса Зебинисо Холиқова инстаблогерга атаб пост қолдирди ва бу хабардан ўзига кела олмагани ҳақида гапирди.

“Укамдек яқин бўлиб қолган инсоним экан. Бугунги хабардан кейин ўзимга кела олмадим. Ҳар куни Instagramъда кўравериб шунақа яқин бўлиб қолган экан. Ҳаётда бир марта кўрган эдим”, — дейди актриса. 

Хонанда Манзура ҳам марҳум блогернинг яқинларига сабр тилади ва унинг яхшилик қилгани ҳақида сўзлаб берди.

“Қазо қадардан қочиб бўлмайди, аммо шу белгиланган вақт ичида анча яхшилик қилишга бизга имкон берилади”, — деб пост қолдирган хонанда.