Гипергидроз кундалик ҳаётда кўп ноқулайликларни келтириб чиқаради. Ортиқча терлашнинг сабаби нима бўлишидан қатъи назар, кўпчилик организмнинг ўзига хос хусусиятларига мослашиб, у билан яшаши керак. Қуйида терни назорат остида ушлаб туришга ёрдам берадиган фойдали маслаҳатлар баён этилган.
Табиий матолардан тикилган кийимларни кийинг
Асосан оқ рангдаги табиий “нафас оладиган” матолардан тикилган кийимларни ёки аксинча, жуда тўқ рангдаги пахтадан тикилган кийимларни танланг. Тер доғлари, айниқса, ипакда билиниб қолади.
Қўлтиқ ости махсус ёстиқчалардан сотиб олинг
Ушбу махсус воситалар тўғридан тўғри кийимга ёпишувчи томони билан бириктирилади. Унинг ичидаги ютувчи материал ортиқча терни ўзлаштиради ва ёқимсиз ҳидлар пайдо бўлишининг олдини олади. Бу муаммони узоқ вақт унутишга ёрдам беради.
Фойдали усул: Қўлтиқ остидаги матони тердан ҳимоя қилиш учун гигиеник салфеткадан ҳам фойдаланиш мумкин.
Антиперспирант салфеткаларни сотиб олинг
Ўзингиз билан бир пакет терга қарши салфетка олиб юринг. Улар, айниқса, иссиқ кунларда юз ва тана терисини парвариш қилишни осонлаштиради.
Агар оёқларингиз терласа
Оёқ терлашини камайтириш ва ёмон ҳиднинг олдини олиш учун оёқларингизга чақалоқлар учун мўлжалланган кукун сепинг. Кукун суюқликни ўзлаштиради, терини бактерия ва замбуруғлардан ҳимоя қилади.
Maxсус тагликлар сотиб олинг
Гипергидроз замбуруғ ва бактериал инфекцияларнинг энг кўп учрайдиган сабабларидан биридир, чунки ҳўл поябзал патогенлар учун ниҳоятда қулай жойдир. Ортиқча намликни ўзига сингдирадиган ва терингизни касалликлардан ҳимоя қиладиган терни ютиш қатламига эга махсус поябзал ички тагликлардан олинг.
Истеъмол содасидан фойдаланинг
Тер, айниқса, оқ кийимларда кўринадиган хунук сариқ доғлар қолдиради. Улардан халос бўлишнинг энг осон йўли — сода пастаси (2 қисм истеъмол содаси учун 1 қисм сув). Маҳсулотни ифлосланган жойларга қўлланг, 30-60 дақиқага қолдиринг, кейин кийимларни одатдаги тарзда ювинг.
Қаҳва ва аччиқ овқатлардан сақланинг
Таркибида кофеин бўлган ичимликлар, спиртли маҳсулотлар, аччиқ таомлар иссиқлик ишлаб чиқаришни рағбатлантиради, асосий вазифаси терморегуляция бўлган тер миқдорини оширади. Иссиқ кунларда совуқ чой ёки оддий сув ичинг. Помидор шарбати ҳам терни назорат остида ушлаб туришга ёрдам беради. Бу ичимлик тер безларининг каналларини тўсиб қўядиган ва намликни чиқариш интенсивлигини камайтирадиган бириктирувчи хусусиятларга эга.
Кийимни тўғри танланг
Ёзги гардеробингизни енгсиз блузкалар ва футболкалар билан тўлдиринг, қўлтиқ остидаги вентиляцияни таъминланг. Ушбу усул кийимдаги нам доиралар пайдо бўлишининг олдини олишга ёрдам беради.
“Навбатчилик чамадонини” йиғинг
Ҳар доим терни назорат остида ушлаб туриш учун зарур нарсаларни олиб юринг: кукун, дезодорант, терга қарши салфеткалар ва лозим бўлганда алмаштириш учун кийим. Машинангизда ёки иш столингизда “навбатчи сумкача”ни сақланг ва керак бўлганда фойдаланинг.
Журнал тутинг
Ҳаддан ташқари кўп терлашни қўзғатадиган ҳолатлар, ишлаб чиқарилган тер миқдори ва у билан энг яхши курашишга ёрдам берадиган воситалар ҳақида маълумотни қайд қилинг. Агар сиз гипергидроз муаммоси билан шифокор ҳузурига боришга қарор қилсангиз, бу маълумотлар жуда фойдали бўлади. Ва бундан тортинмаслик керак.
Мавзуга доир:
Изоҳ (0)