Президент администрацияси шўба мудири Саида Мирзиёева Сенат томонидан маъқулланган қонун лойиҳасини ўқитувчилар ҳимояси йўлида ташланган катта қадам деб баҳолади.
Таъкидланишича, Сенат томонидан ўқитувчиларни мажбурий меҳнатга жалб этганлик учун жиноий жавобгарликкача бўлган жазони назарда тутувчи қонуннинг маъқулланиши ўқитувчилар ҳимояси йўлида ташланган катта қадам ҳисобланади.
“Ишончим комилки, энди уларни вазифасига кирмайдиган ишларга мажбурламоқчи бўлганлар қонун олдида жавоб беришига тўғри келади. Қонунни президент имзолагач, ўқитувчилар, умуман, таълим соҳаси учун катта воқелик бўлади. Кутамиз”, — Президент администрацияси Ижро этувчи аппаратининг Коммуникациялар ва ахборот сиёсати бўйича шўба мудири хабарида.
Эслатиб ўтамиз, 2 март куни Олий Мажлис Сенатининг 37-ялпи мажлисида “Педагог ходимларнинг хизмат вазифаларини бажаришига тўсқинлик қилганлик учун жавобгарлик кучайтирилиши муносабати билан Жиноят кодексига ҳамда Маъмурий жавобгарлик тўғрисидаги кодексга қўшимча ва ўзгартишлар киритиш ҳақида”ги қонун муҳокама қилинганди. Ҳужжатга мувофиқ Жиноят кодексига педагог ходимларни меҳнатга мажбурлаганлик учун маъмурий жазо қўлланганидан кейин худди шундай қилмишни такроран содир этганлик учун жиноий жавобгарликни назарда тутувчи норма киритилмоқда.
Изоҳ (0)