Украинадаги уруш сабабли АҚШ Россияга нисбатан кенг кўламли санкцияларни жорий этганига қарамай, уларни четлаб ўтиш ҳолатлари кузатилмоқда. Бу ҳақда АҚШ Савдо вазирлиги, Адлия вазирлиги ва Молия вазирлиги томонидан тузилган санкцияларни четлаб ўтишга қарши курашиш бўйича тавсияномасида маълумот берилди.
Департаментлар биринчи навбатда, Америка маҳсулотлари ёки санкцияга тушган бошқа товарлар билан савдо қилувчи компанияларни ҳушёр бўлишга чақирди. Шунингдек, санкцияларнинг бузилиш белгилари мавжуд бўлса, қўшимча текширувлар ўтказишни тавсия қилди.
Санкцияларни четлаб ўтишга уриниш сифатида кўрилиши мумкин бўлган белгилар:
- харидорнинг маҳсулотдан нима мақсадда фойдаланмоқчи экани ҳақидаги маълумот беришни истамаслиги, шу жумладан махсус ҳужжатни тўлдиришдан бош тортиши;
- халқаро банк ўтказмалари учун қалбаки компанияларидан фойдаланиш;
- сотиб олинган товарларни ўрнатиш, ўргатиш ёки техник хизмат кўрсатишдан бош тортиш;
- мижознинг IP-манзили ва у томонидан кўрсатилган манзил ўртасидаги фарқ;
- интернетда кам тавсифланган ёки умуман нотаниш ташкилотлар билан операциялар;
- товарларни Хитой (шу жумладан Гонконг ва Макао), шунингдек, Россияга яқин бўлган бошқа мамлакатлар — Арманистон, Туркия, Ўзбекистон орқали етказиб бериш;
- харидорга алоқадор бўлмаган компаниядан тўловни қабул қилиш ва бошқалар.
Қайд қилинишича, 2023 йилнинг уч ҳафтасида АҚШ Молия вазирлигининг Молиявий жиноятларга қарши курашувчи FinCEN бўлими банкларнинг Россияга қарши санкцияларни четлаб ўтишга доир уринишлари бўйича 100 дан ортиқ хабар олган.
Bloomberg хабарига кўра, шунча миқдордаги хабар ўтган икки йил давомида олинган эди. Хабарлар сонининг кескин ошиши АҚШ расмийларининг хабар етказувчиларни мукофотлаш ваъдаси билан боғлиқ — улар санкцияларни бузганлик учун расмийлар ундирадиган жариманинг 10 дан 30 фоизигача мукофот олиши мумкин.
Изоҳ (0)