Жаҳон банки зилзилалар оқибатида Сурияга қанча зарар етганини ҳисоблади

Жаҳон банки ҳисоботига кўра, 6 февраль куни Туркия ва Сурияда содир бўлган зилзила Сурияга 5,1 миллиард долларга яқин зарар етказган.

Шикастланган инфратузилманинг нархи мамлакат ялпи ички маҳсулотининг тахминан 10 фоизини ташкил қилади. Суриянинг 10 миллионга яқин аҳоли истиқомат қиладиган тўрт вилоятига жиддий зарар етган.

Хабарда айтилишича, давом этаётган афтершоклар туфайли зарар миқдори ортиши мумкин. Жаҳон банки эълон қилган сумманинг 18 фоизи инфратузилма (транспорт, энергетика ва сув таъминоти), 48,5 фоизи турар жой биноларига ва 33,5 фоизи нотураржой биноларига (тиббиёт муассасалари, мактаблар, хусусий уйлар) етказилган зарарга тўғри келади.

 “Йўқотишлар Сурия халқи ўтган йиллар давомида бошдан кечирган кўп йиллик вайронагарчилик, азоб-уқубатлар ва маҳрумлик туфайли янада кучайди”, — деди Жаҳон банкининг Яқин Шарқ бўйича директори Жан-Кристоф Карре. Унинг қўшимча қилишича, табиий офат иш фаоллигини пасайтиради ва Суриянинг иқтисодий ўсиш истиқболларини янада оғирлаштиради.

6 февраль куни Туркия ва Сурияда 7,7 магнитудали зилзила содир бўлди, ундан кейин кучсизроқ силкинишлар рўй берди.

12 февраль куни Жаҳон соғлиқни сақлаш ташкилоти Суриядаги зилзила оқибатида 8,5 мингга яқин одам ҳалок бўлгани ва 10 мингга яқин киши жароҳатлангани ҳақида хабар берган бўлса, 14 февраль куни Сурия Соғлиқни сақлаш вазирлиги 1 414 қурбон ҳақида маълум қилди.

1 март ҳолатига кўра Туркияда зилзила қурбонлари сони 45 089 кишига етган. Президент Ражаб Тоййиб Эрдўған бу табиий офатни мамлакат тарихидаги энг ҳалокатли деб атаган.