Тайван Қуролли кучлари оролга яқинлашиб келаётган Хитой халқ озодлик армиясининг 24 та самолёти ва тўртта кемасини қайд этди. Бу ҳақда Тайван мудофаа вазирлиги сайтидаги хабарда айтилади.
“Соат 06:00 ҳолатига (Тошкент вақти билан 03:00) кўра, жами 24 та самолёт аниқланди. Жануби-ғарбий томондан Хитой халқ озодлик армиясининг 12 та учувчисиз учар аппарат ва жами тўртта кемаси Тайван ҳаво мудофаасининг идентификация зонасига кирди. Орол Қуролли кучлари вазиятни кузатмоқда, авиация, денгиз флоти ва ердаги зенит-ракета тизимлари юқори шай ҳолатга келтирилмоқда”, — дейилади хабарда.
Тайван Мудофаа вазирлиги аниқлик киритишича, 12 та учувчисиз учар аппарат — ҳарбий дронлар, кўп мақсадли қирувчилар ва электрон разведка самолётларидир.
1 март куни орол Қуролли кучлари Хитойнинг уч кемаси ва 25 та самолётини аниқлаганди, улардан 19 таси жануби-ғарбий томондан Тайваннинг ҳаво мудофаасини аниқлаш зонасига кирган.
АҚШ Вакиллар палатаси спикери Ненси Пелосининг август ойида оролга ташрифи ортидан Хитой ва Тайван ўртасидаги муносабатлар кескин ёмонлашган. Пекин Тайванни ўз ҳудуди деб билади ва бошқа давлатлар расмийларининг ташрифини орол мустақиллигини қўллаб-қувватлаш сифатида кўради. Пелосини Хитой расмийлари “Ягона Хитой” тамойилини бузганликда айбламоқда. Шундан сўнг Пекин Тайван бўғози ҳудудида реал ўт очиш машғулотларини бошлади.
Изоҳ (0)