Даниянинг бир палатали парламенти (Фолкетинг) давлат байрами сифатида нишонланадиган Буюк ибодат кунини бекор қилиш учун овоз берди, деб ёзмоқда “Dr.dk” нашри.
Байрам 1686 йилда жорий этилган, у Пасхадан кейинги тўртинчи жума куни нишонланади, бу йил байрам 5 майга тўғри келади. 2024 йилдан бошлаб Буюк ибодат куни давлат байрами мақомини йўқотади, 95 нафар парламентарий ушбу қарорни ёқлаб, 68 нафари қарши овоз берди.
Дания бош вазири Метте Фредериксен бу чора мудофаа бюджетини оширишга қаратилганини айтди: “Бу ҳозирги хавфсизлик ҳолати билан боғлиқ. Дания мудофаа учун имкон қадар кўпроқ пул сарфлаши керак”.
Мамлакат Молия вазирлиги маълумотларига кўра, байрамнинг бекор қилиниши ва қўшимча иш кунининг жорий этилиши давлат ғазнасига 3 миллиард крон (тахминан 400 миллион евро) даромад келтиради. Дания ҳукумати НАТО аъзоси сифатида алянсга аъзо давлатлар томонидан тузилган шартномаларга мувофиқ, ялпи ички маҳсулотнинг камида 2 фоизини мудофаага сарфлашни таъминлашга интилмоқда. Улар Россиянинг Украинадаги босқини фонида 2030 йилгача бу мақсадга эришмоқчи, деб ёзади AP. НАТО маълумотларига кўра, Дания 2022 йилда мудофаа учун ЯИМнинг 1,39 фоизини сарфлаган.
Байрамнинг бекор қилиниши бутун мамлакат бўйлаб норозиликларга сабаб бўлди. Данияда аҳолининг 73 фоиздан ортиғи лютеран черковига боради. Касаба уюшмалари онлайн петиция бошлади, у 500 000 га яқин имзо тўплади. Февраль ойида Копенгагендаги парламент биноси ёнида норозилик намойиши бўлиб ўтди.
Изоҳ (0)