ОКМК Тошкент ҳавосидаги чангнинг асосий сабабчиси эканлиги ҳақидаги хабарлар рад этилди

Тошкент вилоятида жойлашган Олмалиқ кон-металлургия комбинати Telegramъдаги “Эффект Макаренко” каналида пойтахтдаги чангларнинг асосий сабаби “Ёшлик-1” кони экани айтилган хабарларга муносабат билдирди.

“Тошкентдаги чангларнинг асосий сабаби — бу ОКМК янги ъЁшлик-1ъ конида ишларини бошлаганидир. У ерда ҳар куни портлаш ишлари амалга оширилмоқда. Бир неча юз минг тонна тоғ массаси ҳавога кўтарилмоқда, асосан қуруқ тупроқ ва гипс. Ва шамол буларнинг барчасини Тошкентга учиряпти”, — дейилади Никита Макаренконинг постида.

Қайд этилишича, “Ёшлик-1” конида устки қатлам ишларини амалга ошириш ва руда қазиб олиш мақсадида бурғилаш ва портлатиш ишлари меъёрий талабларга мувофиқ амалга оширилмоқда.

“Шу билан бирга, кон очиш ишлари тоғ жинсларини, диоритлар ва сиенито-диоритлар туб жойлашувлари, шунингдек, рудаларни қазиб олиш учун амалга ошириб борилади. Шу ўринда таъкидлаб ўтиш зарурки, туб жинсларининг қаттиқлиги Протодяконов шкаласи коэффициенти бўйича кон майдонида IX дан XIV гачани ташкил қилади”, — дейилади ОКМК хабарида.

Бундан ташқари, корхона баёнотида келтирилишича, СанПиннинг №0350-17-сонли “Ўзбекистон Республикасининг аҳоли яшайдиган ҳудудларида атмосфера ҳавосини муҳофаза қилишнинг санитария нормалари ва қоидалари”, “Рангли металларни қазиб олиш учун чиқинди тўплаш омборлари ва шламйиғгичлар” (6.1.3-банд) низомларига мувофиқ, 500 метрлик санитария муҳофазаси зонасига риоя қилиниши таъминланган.

“ъЁшлик-Iъ кони Олмалиқнинг жанубий қисмида, Тошкент шаҳридан 61,4 километр масофада (азимут йўналиши 333 градус), ундан шимолроқда жойлашган. Шамолнинг ўртача йиллик тезлиги ҳудудда 1,2 метр/секундга тенг, унинг ортиб кетиш эҳтимоли 5 фоиз ва 5 метр/секундгача тенг бўлиши мумкин. Шамолнинг асосий йўналиши — устунлиги шарқда (азимут 90 даража) ва жанубий-шарқда (азимут 120-135 даража)ни кўрсатиши Тошкент шаҳри географик жиҳатдан шамол эсадиган ҳудудда жойлашмаганини исботлайди”, — дейилади комбинат муносабатида.

Таъкидланишича, конларни ўзлаштириш учун лойиҳа олди лойиҳа ҳужжатларида экологик хавфларнинг юзага келиши ва атроф-муҳитга таъсирининг олдини олиш чоралари ҳисобга олинган ва бажарилаётган ишларнинг атроф-муҳитга таъсирининг олдини олувчи чоралар кўрилган.

Эслатиб ўтазми, 2022 йил октябрда Ўзбекистонда атмосферага зарарли ташланмаларнинг 58 фоизи (1,4 миллион тонна) автотранспорт воситаларига тўғри келиши маълум қилинганди. Ўшанда Тошкент шаҳрида бу кўрсаткич 93 фоиз (397 минг тонна)ни ташкил этиши айтилган эди.