Eron taxminan 12 kun ichida yadroviy bomba yaratishi mumkin — Pentagon

AQSH Mudofaa vazirligi Eron “taxminan 12 kun ichida” yadroviy bomba ishlab chiqarishi mumkinligini ma’lum qildi. Bu haqda Reuters xabar berdi.

Vazirlikning siyosat bo‘yicha o‘rinbosari Kolin Kal buni Bayden ma’muriyatining Qo‘shma keng qamrovli harakatlar rejasini (JCPOA) tiklashga intilishining asosiy sababi sifatida ko‘rsatdi.

“Chunki JCPOA’dan chiqqanimizdan beri Eron yadroviy taraqqiyotga erishdi. 2018-yil avvalgi ma’muriyat JCPOA’dan chiqishga qaror qilganida, Eronga bitta bombaga kerakli material ishlab chiqarish uchun taxminan 12 oy kerak bo‘lardi. Hozir esa bu taxminan 12 kunni tashkil qiladi”, — dedi Kal.

Shuningdek, u diplomatiya yo‘li bilan Eronning yadroviy dasturiga qo‘yilgan cheklovlarni qayta tiklashga umid bildirdi.

“Agar bu masalani diplomatiya yo‘li bilan hal qilib, ularning yadroviy dasturi bo‘yicha cheklovlarni qaytarsak, bu boshqa variantlardan ko‘ra yaxshiroq bo‘lardi. Lekin hozirda JCPOA muzlatilgan holatdadir”, — dedi vazir o‘rinbosari.

19-fevral kuni Eronda xalqaro kuzatuvchilar mamlakat yadroviy qurol yaratish uchun zarur bo‘lgan darajadan bir oz past darajada boyitganini aniqladi. Endi MAGATE xodimlari eronlik mutaxassislar 84 foiz soflikdagi boyitilgan uranni qanday qilib to‘plashga muvaffaq bo‘lganini aniqlashga harakat qilmoqda. Bu yadroviy qurolni yaratish uchun zarur bo‘lgan darajadan 6 foiz past. O‘z navbatida, Eron Atom energiyasi tashkiloti uranni boyitish darajasi 84 foizga yetkazilganini rad etdi.

27-fevral kuni AQSH Markaziy razvedka boshqarmasi direktori Uilyam Berns Ukrainadagi urush uchun qurol berish evaziga Moskva Eronga raketa dasturini ishlab chiqishda yordam berayotganini bildirdi.

Yadroviy kelishuv 2015-yilda Eron va BMT Xavfsizlik kengashining doimiy a’zolari (AQSH, Rossiya, Xitoy, Buyuk Britaniya va Fransiya), shuningdek, Germaniya o‘rtasida imzolangan. Kelishuvlar Tehronga uranni 3,67 foizgacha boyitish va maksimal 300 kg uran ishlab chiqarish imkonini beradi. AQSH bir tomonlama ravishda yadroviy bitimdan chiqqanidan so‘ng, Eron yadroviy kelishuv bo‘yicha o‘z majburiyatlarini to‘xtatdi.