Ўзбекистондаги давлат олий таълим муассасаларининг 2022 йилда кўрган даромадлари ва харажатларига оид маълумотлар эълон қилинди.
Олий таълим, фан ва инновациялар вазирлиги томонидан эълон қилинган маълумотларда келтирилишича, 2022 йилда давлат ОТМлари 8,77 триллион сўмдан ортиқ даромад кўрган, харажатлари эса 8,102 триллион сўмдан зиёдни ташкил этган.
Олий таълим муассасаларининг даромадлари бюджетдан молиялаштирилган маблағлар, тўлов-контракт асосида ўқитиш учун тушган тушумлар, ривожлантириш маблағлари бўйича даромадлар ҳисобидан шакллантирилади.
2022 йилда энг кўп соф даромад кўрган олий таълим муассасаларининг қисқа рўйхати қуйидагича:
- Тошкент давлат иқтисодиёт университети – 106,2 миллиард сўм;
- Наманган давлат университети – 67,7 миллиард сўм;
- Бердақ номидаги Қорақалоқ давлат университети – 54,4 миллиард сўм;
- Гулистон давлат университети – 54 миллиард сўм;
- Навоий давлат педагогика институти – 43,2 миллиард сўм.
2022 йилда энг кўп харажат қилган ОТМлар:
- Самарқанд давлат университети — 42,5 миллиард сўм;
- Қарши давлат университети — 28,3 миллиард сўм;
- Самарқанд давлат чет тиллар институти — 26,8 миллиард сўм;
- Фарғона политехника институти — 15,3 миллиард сўм;
- Ажиниёз номидаги Нукус давлат педагогика институти — 15 миллиард сўм.
Маълумот учун, Ўзбекистонда 2016—2022 йилларда 122 та олий таълим муассасаси очилган. Ўтган олти йил ичида республикада ёшларни олий таълимга қамраб олиш даражаси 9 фоиздан 38 фоизга ошган. 2026 йилга бориб бу кўрсаткич 50 фоизга етказилиши режалаштирилган.
Изоҳ (0)